هەرچەندە پارتی کرێکارانی کوردستان بۆ پشتیوانیکردنی بانگەوازی ئاشتی ئاگربەستی ڕاگەیاندووە، بەڵام هێرشەکانی سوپای تورکیا بەردەوامن و لە ڕێی هەلیکۆپتەری جەنگییەوە دەوروبەری دێرەلووکی بۆردومان کرد.
ئەمڕۆ یەکشەممە، کامەران عوسمان نوێنەری ڕێکخرای سی پی تی ئەمریکی ڕایگەیاند، لە کاتژمێر ١:٠٤ خولەکی ئەمشەودا، سوپای تورکیا بە هەلیکۆپتەر هێرشی کردە سەر چیای لینکی لە ناحیەی دێرەلووک لە قەزای ئامێدی و گەریلاکانی پارتی کرێکارانی کوردستانیش بە تەقەکردن وەڵامیان دایەوە.
ئەوەشی خستەڕوو کە لە هێرشەکەدا هیچ هاووڵاتییەکی مەدەنی نەبووەتە قوربانی، بەڵام بەهۆی نزیکی لەناو ناحیەی دێرەلووک، ترس و دڵەڕاوکێی لای هاووڵاتییان دروست کردووە.
ئەم هێرشەی تورکیا لە کاتێکدایە کە دوێنێ پەکەکە لە بە ئامانجی پشتیوانیکردنی بانگەوازەکەی عەبدوڵا ئۆجالان بۆ پرۆسەی ئاشتی، تاکلایەنە ئاگربەستی ڕاگەیاند و ئەوەشی خستەڕوو کە ئەگەر هێرش بکرێتە سەریان وەڵام دەدەنەوە.
