سەرۆکایەتی شارەوانی سلێمانی داوا لە هاووڵاتییان دەکات ئەگەرهاتوو هەر کارمەندێکیان لە هەر پلەیەکدا بوو داوای پارەی لێکردن، سەرۆکایەتی شارەوانی یاخود پۆلیس ئاگاداربکاتەوە.
سەرۆکایەتی شارەوانی سلێمانی ڕایگەیاند، پاش دەرکردنی یاسای قەدەغەکردنی زیادەڕەوی (ژمارە ٣ ساڵی ٢٠١٨) كاری رێگریکردن و لابردنی زیادەڕەوی لەسەر موڵکی دەوڵەت بە تەنها ئەرکی شارەوانیمان نەماوە بەڵکو ئەرکی لیژنەی لابردنی زیادەڕەوییە و تەنها لەسەر فەرمانی سەرۆکی یەکەی کارگێڕی زیادەڕەوییەکە لادەبرێت.
ئەوەشی خستەڕوو لە چۆنیەتیی بەکارهێنانی شۆستە و شەقامەکان و پاراستنی سیمای لە دەسەڵاتی ئەنجومەنی شارەوانیدایە و پێشتر ئەنجومەن بڕیاری لەم بابەتەدا داوە و لایەنە پەیوەندارەکان لەسەر بڕیاری ئەنجومەن کاری لەسەر دەکەن، ڕوونیشیکردەوە کە هەر بەکارهێنانێکی شۆستە و شەقامەکان رەزامەندیی یاسایى نەبێت ئەوا بە زیادەڕەوی دادەنرێت.
لە ڕاگەیەندراوەکەی سەرۆکایەتی شارەوانیدا هاووڵاتییان لە بەرتیلدان ئاگادارکراوەتەوە و تێیدا هاتووە: “ئەگەر هەر فەرمانبەرێکی شارەوانی لە هەر پلەیەکدا بێت داوای پارەی لێ کردن ئەوا دەستبەجێ سەرۆکی شارەوانی یان بەشی کاروباری یاسایى شارەوانیمانی لێ ئاگاداربکەنەوە یاخود لە نزیکترین بنکەی پۆلیس سکالای لەسەر تۆماربکەن و دڵنیابن لەوەی دەست لە هیچ کەسێک ناپارێزرێت و هەر کەسێک بێت بە سزای خۆی دەگات”.
