بەڕێوەبەری گشتی دیوانی وەزارەتی ناوخۆی هەرێمی کوردستان ڕایگەیاند، داهاتی کامێراکانی چاودێری بۆ وەزارەتی دارایی دەگەڕێتەوە و ژمارەی قوربانییانی هاتووچۆش کەمیکردووە.
هێمن میرانی، بەڕێوەبەری گشتیی دیوان لە وەزارەتی ناوخۆی هەرێمی کوردستان لە لێدوانێکیدا بۆ کەناڵی کوردستان 24 ڕایگەیاند: هەموو داهاتی کامێراكان دەگەڕێتەوە وەزارەتی دارایی، تەنیا ئەو بڕە نەبێ کە بۆ چاککردنەوە و هەندێک بابەتی هونەری کامێراکان خەرج دەکرێت.
هێمن میرانی، جەختی لەوە کردەوە، بەهۆی دانانی کامێراکان ڕووداوەکانی هاتووچۆ و ژمارەی قوربانییەکان بەراورد بە ڕابردوو کەمبوونەتەوە.
لەبارەی بەشێک لەو ئۆتۆمبێلانەی دەهێنرێنە ناو هەرێمی کوردستان لە پشکنین دەرناچن و تۆمار ناکرێن، بەڕێوەبەری گشتیی دیوان لە وەزارەتی ناوخۆ، وتی: ئەو جۆرە ئۆتۆمبێلانە بە هیچ شێوەیەک تۆمار ناکرێن کە مەرجەکانی سەلامەتیان تێدا نییە، بەڵکو پێویستە بۆ ئەو بازرگانانە بگەڕێنرێنەوە کە ئۆتۆمبێلەکانیان هێناوەتە ناو کوردستان.
