لیژنەی ئاسایش و بەرگری پەرلەمانی عێراق داوای لە حکومەتی عێراق کرد هەنگاوی بەپەلە بگرێتەبەر بۆ کۆتاییهێنان بە بوونی سەربازانی تورکیا لە خاکی عێراق.
عەلاوی ئەل بەنداوی ئەندامی لیژنەی ئاسایش و بەرگری پەرلەمانی عێراق، بە میدیا عێراقییەکانی ڕاگەیاندووە، “پێویستە حکومەتی عێراق ڕێوشوێنی بەپەلە بگرێتەبەر بۆ کۆتاییهێنان بە بوونی سەربازانی تورکیا لە خاکی عێراق، بەتایبەتی دوای ئاگربەست لەلایەن پارتی کرێکارانی کوردستانەوە، کە ئەنقەرە وەک بیانوویەک بۆ ئەم دەستدرێژییە قبوڵنەکراوە بۆ سەر خاکی عێراق بەکاریهێنا”.
ڕاشیگەیاند، بە پەیامەکەی پەکەکە بۆ ئاگربەست تورکیا هیچ بیانوویەکی بۆ بوونی نایاسایی و ناشەرعی خۆی لە باکووری عێراقدا نییە، هەربۆیە دەبێت بەپەلە کۆتایی بە بوونیان لە عێراق بهێنرێت، چونکە پێشێلکردنی سەروەری عێراقە و ئاسایشی نەتەوەیی وڵاتەکەی دەخاتە بەردەم مەترسییەکان.
پێشتریش عیسام شاکر، سەرکردە لە چوارچێوەی هەماهەنگی، دووپاتی کردەوە کە ئەنقەرە چیتر پاساوێکی نییە بۆ بوونی سەربازانی تورکیا، کە لە نزیکەی 80 شوێن لە باکووری عێراق بوونیان هەیە، ئەمەش دوای ئەوەی عەبدوڵڵا ئۆجەلان سەرۆکی پارتی کرێکارانی کوردستان داوای لە پارتەکەی کرد شەڕ ڕابگرن و پرۆسەی سیاسی ئاشتیانە لەگەڵ ئەنقەرە دەستپێبکەن.
بەنداوی دووپاتیشی کردەوە، “بوونی ئەو هێزانە بۆ چەندین ساڵە بە بیانووی ڕووبەڕووبوونەوەی هەڕەشەی پارتی کرێکارانی کوردستان بووە، بەڵام ئێستا ئەو حزبە بڕیاریداوە چەک دابنێت و گفتوگۆی ئاشتی لەگەڵ دەسەڵاتدارانی تورکیا بکات، بەمەش ئەم کێشە ناوخۆییە کە پەیوەندی بە تورکیاوە هەیە، دەبێت کاردانەوەی هەبێت لەسەر عێراق وەک وڵاتێکی خاوەن سەروەری”.
