ئێوارەی رۆژی 28ی شوباتی 2025، بە ئامادەبوونی ژمارەیەكی زۆر لە هونەرمەندان رۆشنبیرانی ڕۆژهەڵاتی كوردستان و ژمارەیەك لە میوزیكژەنانی شاری سلێمانی و هونەرمەند ئەنوەر قەرەداخی و ئەندامانی بنەماڵەی هونەرمەند محەمەدی ماملێ، لە هۆڵی هۆتێل خورشید لە شاری مەریوان، لە پانزەهەمین مەراسیمی ساڵانەیدا، ناوەندی ماملێ، خەڵاتی ”ماملێ”ی بەخشییە میوزیكژەن و گۆرانیبێژی گەورەی كورد عەلی ئەكبەر مورادی.
مامۆستا عەلی ئەكبەر، لە ڕێی كۆكردنەوەو بەچاپ گەیاندنی ژمارەیەكی زۆر میلۆدییەوە توانیویەتی فەرهەنگ و هونەری یارسان بە ناوچەكانی تری كوردستان و جیهان بناسێنێت و بە دروستكردنی ماڵی تەمبورەش توانیویەتی ژمارەیەكی زۆر فێرخواز و هونەرمەند پێبگەیەنێت لە شاری تاران و كرماشان.
عەلی ئەكبەر مورادی، ساڵی 1957 لە شاری كرماشانی ڕۆژهەڵاتی كوردستان لەدایك بووە و لەبواری گۆرانی و میوزیكی كوردیدا خاوەنی چەندین كاری ناوازەیە، دیارترین كارەكانی لەگەڵ هونەرمەندان ”شەهرامی نازی و كەیهان كەلهوڕ” بووەو بەشداریی چەندین كاری هونەریی كردووە لە لەندەن و سانفرانسیسكۆ و كالیفۆرنیا و چەندین خەڵاتی ناوخۆیی و جیهانیی وەرگرتوە.
بەپێی ڕاپۆرتی گۆڤارێكی بەریتانی، عەلی ئەكبەر مورادی یەكێكە لە 50 میوزیكژەنە باشەكانی جیهان. مورادی لە تەمەنی شەش ساڵیدا فێری ئامێری تەمبور بووەو بۆ بەزیندوو هێشتنەوەی ئەو هونەرەش موچەی خانەنشینی و سەرجەم داهات و سەرمایەكەی خۆی تەرخانكردووە بۆ دروستكردنی ”ماڵی میوزیكی یارسان” لە ئاوایی بان زەلانی زێدی لەدایكبوونی خۆی لە شاری كرماشان.
وێنە و هەواڵ: ڤینۆس تۆفیق
