جێگری سەرۆکی حکومەتی هەرێم لەبارەی بانگەوازی عەبدوڵا ئۆجالان پەیامێکی بڵاوکردەوە و دەڵێت” عەبدوڵڵا ئۆجالان جارێکی دیکە دەرگای بەڕووی ئاشتی و چارەسەری ئاشتییانە کردەوە”.
قوباد تالەبانی، جێگری سەرۆکی حکومەتی هەرێم ڕایگەیاند، کورد هەمیشە گەلێکی ئاشتیخواز بووە، و بزووتنەوە کوردییەکان وەک دوا رێگەچارە و بە ناچاری، بۆ پاراستنی مان و داکۆکی لە مافە بنەڕەتییەکان پەنایان بردوەتەبەر بە چەک.
ئاماژەی بەوەشداوە، ئەمڕۆ عەبدوڵڵا ئۆجالان جارێکی دیکە دەرگای بەڕووی ئاشتی و چارەسەری ئاشتییانە و دیموکراسییەکانی پرسی کورد لە تورکیادا کردەوە و هاوکات دەستپێکی قۆناغێکی نوێی تێکۆشانی سیاسی بۆ کورد لە تورکیا راگەیاند.
قوباد تاڵەبانی جەختیشیکردەوە، هیوادارین و گەشبینین ئەمجارەیان پرۆسەکە بە ئەنجامێکی دڵخواز بۆ هەردوو گەلی کورد و تورک کۆتایی بێت، و پێکەوە بناغەی پێکەوەژیانێکی راستەقینە بونیادبنێن.
هاوکات داوایەکیش لە هەمووان دەکات و دەڵێت”ئەرکی هەموو لایەکمانە پێشوازی لە پەیامەکەی بەڕێز ئۆجالان بکەین و لە هەر چەشنە هاوکاری و پشتیوانییەک بۆ سەرخستنی پرۆسەکە درێخی نەکەین”.
