فەرماندەی هێزەکانی سووریای دیموکرات لەبارەی پرۆسەی سیاسی و بەشداری لە حکومەتی نوێی سووریا پەیامی هەیە و دەڵێت” کەموکورتییەکی گەورە لە بەشداریکردنی نوێنەری ڕاستەقینەی هەموو پێکهاتەکان و چین و توێژەکانی کۆمەڵگا لە پڕۆسەی سیاسیدا هەیە”.
مەزڵوم عەبدی، فەرماندەی هێزەکانی سووریای دیموکرات رایگەیاند، کەموکورتییەکی گەورە لە بەشداریکردنی نوێنەری ڕاستەقینەی هەموو پێکهاتەکان و چین و توێژەکانی کۆمەڵگا لە پڕۆسەی سیاسیدا هەیە، ئەمەش دەبێتە هۆی لاوازی و نەمانی متمانە لەلایەن هەموو سوورییەکانەوە.
ئاماژەی بەوەشدا، پێویستە هەمووان بەشدار بن لە پرۆسەی سیاسی و نووسینی دەستووری نوێ و حکومەتی ڕاگوزەری سووریا.
مەزڵوم عەبدی لەبارەی پرۆسەی دانوستان لەگەڵ سووریا ڕایگەیاند، ئێمە دووپاتی دەکەینەوە کە پابەندین بە پرۆسەی دانوستان لەگەڵ ئیدارەی نوێ لە دیمەشق، و پابەندین بە کارکردن لەگەڵ هەموو گروپە سووریاییەکان لە هەموو ناوچەکان بەبێ جیاوازی.
مەزڵوم عەبدی وتیشی، هەموومان لەسەر یەکێتی خاکی سووریا و دامەزراوە سەربازی و مەدەنییەکانی دەوڵەت لە چوارچێوەی سووریایەکی لامەرکەزیدا هاوڕاین، ئێمە ئەولەویەتمان هەیە، کە بریتین لە وەستاندنی هێرشەکانی تورکیا و کارکردن بۆ گەیشتن بە ئاگربەستێکی هەمەلایەنە، هاوکات دیمەشق دەبێت لەمەدا ڕۆڵی خۆی بگێڕێت.
عەبدی ڕاشیگەیاند، لە ماوەی ساڵانی ڕابردوودا شەڕی ڕێکخراوی تیرۆرستیمان کرد و ڕووبەڕووی دەستێوەردانەکانی ڕژێمی ئەسەد بووینەوە.
عەبدی داواشیکرد سەرجەم نوێنەرانی پێکهاتەکان لە ئیدارەی خۆسەر کرد بەشداری گفتوگۆیەکی ناوخۆیی بکەن بۆ گەیشتن بە دیدگایەکی هاوبەش لەسەر پرۆسەی سیاسی.
