شاندی دەم پارتی سەردانی ئیمرالی دەکات و چاوەڕوان دەکرێت لە کۆنفرانسێکی ڕۆژنامەوانیدا ئەنجامەکە ئاشکرا بکرێت کە گرنگترین بەشی پەیوەندی بە دەستبەرداربوونی پەکەکەوە هەیە لە خەباتی چەکداری.
ئەمڕۆ پێنجشەممە، شاندی دەم پارتی بۆ ئەنجامدانی سێیەمین دیدار لەگەڵ عەبدوڵا ئۆجالان، سەرۆکی زیندانیکراوی پەکەکە بەرەو گرتووخانەی ئیمرالی بەڕێکەوت، ئەمجارە جیاواز لە سەردانەکانی پێشوو، شاندەکە لە حەوت کەس پێکدێت کە جگە لە ئەحمەد تورک، پەروین بوڵدان و سری سورەییا ئۆندەر، هەریەک لە توڵای هاتیمەئۆغوڵاری و تونجەر باکرهان هاوسەرۆکانی دەم پارتی و دوو کەسایەتی دیکە لەخۆدەگرێت.
بڕیارە کاتژمێر 5ی ئێوارەی ئەمڕۆ لە ئیستانبوڵەوە ئەنجامی سەردانەکە و پەیامی عەبدوڵا ئۆجالان ڕابگەیەندرێت کە لە ئامەد و وانیش لە ڕێی دانانی شاشەی گەورە لە گۆڕەپانەکاندا پەخش دەکرێت.
دەم پارتی داوای لە هاووڵاتییان کرد ئەمڕۆ بچنە گۆڕەپانەکان و پێشوازی لە پەیامەکەی ئۆجالان بکەن کە بە “بانگەوازی سەدە” وەسفیانکرد.
چاوەڕوان دەکرێت ئۆجالان لە بانگەوازەکەیدا بۆ پرۆسەی ئاشتی و چارەسەرکردنی پرسی کورد، داوا لە پەکەکە بکات دەستبەرداری خەباتی چەکداری بێت.
