“بۆ هەناردەکردنەوەی نەوتی هەرێمی کوردستان چاوەڕێی وەڵامی تورکیا دەکەین”

وه‌زیری نه‌وتی عێراق ڕایگه‌یاند بۆ به‌گه‌ڕخستنه‌وه‌ی بۆری نەوتی به‌نده‌ری جه‌یهان، له‌گه‌ڵ هه‌رێمی كوردستان ڕێككه‌وتوون و ئێستا چاوەڕێی وەڵامی تورکیا دەکەن.

حه‌یان عه‌بدولغه‌نی وەزیری نەوتی عیراق ڕایگەیاند، زنجیره‌یه‌ك كۆبوونه‌وه‌یان له‌گه‌ڵ وه‌زاره‌تی سامانه‌ سروشتییه‌كانی هه‌رێمی كوردستان كردووه‌ و لێكگه‌یشتنی به‌رهه‌مدار و گرنگییان هه‌بووه‌.

ئەوەشی خستەڕوو کە پەیوەندییەکانیان لەگەڵ لایەنی تورکی بەردەوامە بۆ ئەوەی لە ماوەی دوو ڕۆژی داهاتوودا دەست بە هەناردەکردنەوەی نەوتی هەرێمی کوردستان بکەین.

حەیان عەبدولغەنی وتیشی، لای عێراقەوە هەموو ئامادەکارییەکان تەواو بوون و چاوەڕێی وەڵامی لایەنی تورکی دەکەن بۆ ئەوەی دەست بە هەناردەکردنەوەی نەوت بکەین.