فڕاکسیۆنی یەکگرتووی ئیسلامی لە پەرلەمانی عێراق لەبارەی مووچە و تەوتینەوە کۆنفراسێکی ڕۆژنامەوانیان ئەنجامدا و ڕایانگەیاند، بەغدا مانگانە ترلیۆنێک دینار دەنێرێت، بەڵام هەرێم بەردەوام کێشە بۆ مووچە دروست دەکات.
د. موسەنا ئەمین و دارا سێکانیانی، ئەندامانی فڕاکسیۆنی یەکگرتوو لە پەرلەمانی عێراق لە بارەی مووچەی مووچەخۆرانی هەرێم و بریارەکانی دادگای فیدڕاڵی ڕایانگەیاند، دەسەڵاتدارانی هەرێم بەردەوام کێشەیان بۆ مووچەخۆران دروست کردووە و ئاستەنگ و لەمپەڕ لەبەردەم ڕێکكەوتنەکانی هەولێر و بەغدا دروست دەکەن.
ئاماژەیان بەوەشکرد، زیاتر لە ساڵێک بەسەر بڕیاری دادگای فیدڕاڵی تێپەڕبووە، کەچی بەرپرسانی هەرێم نەیانویستووە پابەند بن و یاری بە قوت و بژێوی خەڵکەوە دەکەن.
جەختیشیان كردەوە، هیچ ڕەوا نیە سەدان ملیار دینار لە هەرێم بەهەدەر دەدرێت بۆ گیرفانی دوو کۆمپانیای حزبی، لەگەڵ ئەوەشدا تەنها ٥٢ ملیار دینار بۆ بەغدا دەنێرێت، کە تاک بە تاکی هەرێمی کوردستان دەزانن کە هیچ ڕاستیەک لەو بارەوە نیە و داهاتەکان دەدزرێن.
ئەمە لەكاتێكدایە، كە سەرباری ڕێككەوتنی هەرێم و عێراق لەسەر دابەشكردنی مووچەی مانگانەی هەرێم، بەڵام ئەمڕۆ 26ی مانگی شوباتە لیستی مووچەی مانگی 2 ڕەوانەی بەغدا كراوە و بەوەش تا وردبینی تەواو دەبێت و پارەی مووچە دەگاتە هەرێم و لیستی مووچە ڕادەگەیەنرێت دابەشكردنی مووچە دوادەكەوێت و دەچێتە ناو مانگی 3 و ڕەمەزانەوە.
