بەسەرپەرشتی سەرۆك وەزیرانی عێراق و وەزیری نەوت، كۆمپانیای نەوتی باكوور گرێبەستی پەرەپێدانی چوار كێڵگەی نەوتی لە كەركوك لەگەڵ كۆمپانیای (بریتش پترۆڵیۆم) واژۆ كرد.
نووسینگەی ڕاگەیاندنی سەرۆك وەزیرانی عێراق بڵاویكردەوە، ئەمڕۆ سێ شەممە، بە سەرپەرشتی محەمەد شیاع سودانی و ئامادەبوونی حەیان عەبدولغەنی، وەزیری نەوت، گرێبەستی پەرەپێدانی چوار كێڵگەی نەوتی كەركوك لەنێوان كۆمپانیای نەوتی باكوور و بریتش پترۆڵیۆم واژۆكرا.
ئاماژە بەوەشدراوە، ئەم واژۆکردنە دوای ڕێککەوتنێک دێت لەگەڵ کۆمپانیای پەیوەندیدار سەبارەت بە پرسە تەکنیکییەکان و مەرجە گرێبەستییەکان، لەوانەش مۆدێلی ئابووریی پڕۆژەکە، لەسەر بنەمای ئەو یاداشتانەی لێکتێگەیشتن کە لە لەندەن لە سەردانەکەی ئەم دواییەی سەرۆک وەزیران بۆ بەریتانیا واژۆ کران، کە ئامانج لێی دەستەبەرکردنی باشترین مەرج و سودەکانی گرێبەست بوو بۆ لایەنی عێراقی، دوای دانوستانی وردی درێژخایەن لەگەڵ وەزارەتی نەوت، بەپێی ڕێنماییەکانی سەرۆک وەزیران، بۆ باشترین وەبەرهێنان و دابینکردنی وزە نەوتی خاو بۆ پاڵاوگەکانی باکوور و کەمکردنەوەی پشتبەستنیان بە نەوتی باشوور و ڕێککەوتنەکەش قۆناغی کۆتاییە پێش واژۆکردنی کۆتایی گرێبەستەکە.
ئاشكراشی كردووە، ڕێککەوتنەکە بریتییە لە پەرەپێدانی چوار کێڵگەی سەرەکی کەرکوک “بای حەسەن، کەرکوک بە دوو قوبەکەی (بابا و ئاڤانا)، جەمبور، خەبازە”، دڵنیابوون لە وەبەرهێنانی غازی پەیوەندیدار، هەروەها نۆژەنکردنەوە و فراوانکردنی دامەزراوەکانی غاز لە کۆمپانیای غازی باکوور و دامەزراندنی وێستگەیەکی کارەبای 400 مێگاوات بۆ گەیشتن بە ئامانجە خوازراوەکانی ئەم پڕۆژە ستراتیژییە یەکگرتووە.
ڕاشیگەیاندووە، ئەم پڕۆژەیە کرێکاران لە پسپۆڕییە جیاوازەکان دابین دەكات، بەجۆرێك بۆ کارپێکردنی کۆمپانیا ناوخۆییەکان، جێبەجێکردنی پڕۆژەکانی سوودی کۆمەڵایەتی و پەرەپێدانی تواناکانی ئەندازیاری و سەرچاوە تەکنیکییەکان، پاڵپشتیکردنی ستافی کۆمپانیای نەوتی باکوور و کۆمپانیای غازی باکوور، لە چوارچێوەی دیدگای حکومەت بۆ بەرنامەکانی ڕاهێنان و بەرزکردنەوەی ئاستی لێهاتووییەکان لە چوارچێوەی ئەوەی کە نەوتی بەریتانی پێشکەشی دەکات، بە هەماهەنگی لەگەڵ وەزارەتی نەوت.
