هاوسەرۆکی کۆما جڤاکێن کوردستان جەخت دەکاتەوە کە دەبێت ئەو پەیامەی چاوەڕوان دەکرێت عەبدوڵا ئۆجالان دەربارەی پرۆسەی ئاشتی ئاڕاستەی قەندیلی بکات، ڤیدیۆیی بێت و گۆشەگیرییشی لەسەر هەڵبگیرێت.
بەسێ هۆزات، هاوسەرۆکی کۆنسەی بەڕێوەبەری کەجەکە لە چاوپێکەوتنێکیدا لەگەڵ میدیای حزبەکەیدا وەڵامی لێدوانێکی وەزارەتی دادی تورکیای دایەوە کە رایگەیاندبوو ڕێ نادەن ئۆجالان پەیامی ڤیدیۆیی بڵاوبکاتەوە.
لەو بارەیەوە بەسێ هۆزات گوتی، قسەیەکی ناجددییە و بە توندی ئەم هەڵوێستە ڕەتدەکەینەوە و بە هیچ جۆرێک قبوڵی ناکەین”.
بەسێ هۆزات ڕاشیگەیاند ” دەبێت بارودۆخی گۆشەگیرکراوی ڕێبەر ئاپۆ بگۆڕدرێت، گۆڕانێک بۆ باشکردن بێت. دەبێت بەتەواوەتی گۆشەگیری لاببرێت و ڕێبەر ئاپۆ ئازاد بێت. لەناو هەلومەرجی ئازاد و گونجاوی کاردا بتوانێت بە ڕۆڵی خۆی هەستێت، هەوڵبدات، پرۆسەی گۆڕانکاری دیموکراتیکی دامەزرێنێ و بەم شێوەیە بێت. گەر وانەبێ دەبێت چۆن بێ؟”.
ئەم لێدوانە لە کاتێکدایە کە چاوەڕوا دەکرێت ئۆجالان لە زیندانەوە پەیامێک دەربارەی پرۆسەی ئاشتی ئاڕاستەی قەندیل بکات.
