ئەنجوومەنی نیشتمانی كوردی سووریا “ئەنەكەسە” هەڵوێستی سەبارەت بە كۆنگرەی دیالۆگی سووری، كە بەبێ كورد بەڕێوەدەچێت و هیچ شاندێكی كورد بەشداری پێ نەكراوە ڕادەگەیەنێت و دەڵێت: بەڕێوەچوونی كۆنگرەكە بەم شێوەیە كە پێكهاتە سیاسییە نەتەوەییەكان فەرامۆش و پەراوێز خراون، پێشێلكردنی بنەماكانی مافی هاوبەشی گەلی كوردە لە پڕۆسەی نوێی سیاسی سووریادا.
ئەنجوومەنی نیشتمانی كوردی سووریا (ئەنەكەسە) لە بەیاننامەیەكدا ڕایگەیاند، بە وردی چاودێری كۆنگرەی دیالۆگی سوورییان كردووە، كە ڕۆژانی 24 و 25ـی ئەم مانگە بەڕێوە دەچێت و پشتیوانی خۆیان بۆ هەر هەوڵێك دەربڕیوە، كە پڕۆسەی سیاسی لە سووریا بخاتە سەر پێی خۆی و كۆتایی بە نەهامەتییەكانی گەلی سووریا بهێنێت و دەوڵەتێكی دیموكراسی و لامەركەزی بهێنێتە ئاراوە، كە هەموو پێكهاتە نەتەوەیی، ڕۆشنبیری و ئایینییەكان لە خۆ بگرێت و لە ڕێگەی دەستوورەوە مافی هەمووان لە پێشەوەی هەموویشیان مافی كورد بە گوێرەی یاسا و ڕێككەوتنە نێودەوڵەتییەكان بپارێزێت.
ئاماژەی بەوە كردووە، بەڕێوەچوونی كۆنگرەكە بە پەلەپەلی و پەراوێزخستن و فەرامۆشكردنی پێكهاتە سیاسییە نەتەوەییەكان لەناویشیاندا ئەنەكەسە، پێشێلكردنی ئاشكرای بنەما و مافی هاوبەشیی نیشتمانیی گەلی كوردە لە پڕۆسەی سیاسی نوێی سووریادا، كە كار بۆ بەدیهێنانی ئاییندەیەكی باشتری گەلانی سووریا دەكات.
ئەنەكەسه جەختیشی كردۆتەوە، بانگهێشتكردنی میوانان بە شێوەی تاكەكەسی و سەربەخۆ بە دەرە لە پێوەرەكان بۆ نوێنەرایەتیكردنی ڕاستەقینەی هێز و لایەنە سیاسییەكان و پێكهاتەكانی سووریا بەتایبەتی نوێنەرانی ڕاستەقینەی كورد، ئەمەش پرسیار لەبارەی كرۆك و ئامانجی كۆنگرەكە دروست دەكات.
