پەرلەمانتارێكی فراكسیۆنی یەكێتی لە پەرلەمانی عێراق ڕایدەگەیەنێت، بابەتی توتینكردنی مووچەی فەرمانبەران، لەلایەن دادگای فیدراڵی عێراقییەوە یەكلایی كراوەتەوە و دەبێت تێكەڵ بە هیچ گفتوگۆ و ململانێیەكی سیاسی نەكرێت و دەشڵێت: دەبێت هاوشێوەی عێراق بێت و باسی بانكی ئەهلی نەكراوە.
د.نەرمین مەعروف، ئەندامی لیژنەی دارایی لە پەرلەمانی عێراق بە میدیاكانی حزبەكەی ڕاگەیاندووە، دادگای فیدراڵی لەیەكەم بڕیارییەوە تا كۆتایی بڕیاری، كە بەرلەچەند ڕۆژێك دەریكردووە لەبارەی تەوتینی مووچەی فەرمانبەران لەهەموو بڕیارەكانیشدا جەختی لەوەكردووەتەوە، كە دەبێت مووچەی فەرماتبەرانی هەرێم هاوشێوەی فەرمانبەرانی عێراق تەوتین بكرێن ئەمە یەكلایی بووەتەوە.
ڕاشیگەیاند، بڕیارەكانی دادگای فیدراڵی و هەروەها ئەو نووسراوانەشی لەو بابەتەدا دەریكردوون جەخت لەوەكراوەتەوە، كە دەبێت هەموو مووچەخۆرانی هەرێم وەكو عێراق مووچەكەیان تەوتین بكرێت، بۆیە لیكدانەوەی دیكە هەڵناگرن.
وتیشی، “دادگای باڵای فیدڕاڵی لە بڕیارەكانیدا جەختی لەوەكردووەتەوە، كە دەبێت تەوتین بەو ڕیكارانەبێت، كە لە بانكە فیدراڵییەكان دەكرێت و لەهیچ نووسراو و بڕیارێكدا باس لە بانكی ئەهلی نەكراوە، چونكە فەرمانبەرانی عێراقیش لە بانكە فیدراڵییەكان تەوتینی مووچەكانیان كراوە”.
ئەمە لەكاتێكدایە، كە حكومەتی هەرێم پڕۆسەی “هەژماری من”ی ڕاگەیاندووە بۆ بەبانكی كردنی مووچەی مووچەخۆرانی هەرێم، بەڵام یەكێتی لەسەر زاری سەرۆكی حزبەكەی و بەرپرسەكانییەوە لە ماوەی ڕابردوودا و بەتایبەت بانگەشەی هەڵبژاردنی ساڵی ڕابردوودا ڕەتیان كردەوە “هەماری من” بكەن و شوێنی تیمەكانی هەژماری من-یان لە سلێمانی داخست و ڕایانگەیاند، كە پێی ڕازی نابن و دەبێت مووچە وەك بڕیاری دادگای فیدڕاڵی تەوتین بكرێت.
بەڵام دوێنێ بافڵ تاڵەبانی، سەرۆكی یەكێتی لە بەغدا ڕایگەیاند، لە میانی کۆبوونەوەی لەگەڵ مەسرور بارزانی باسیان لە (هەژماری من) کردووە و پرۆژەکەش هەڵمەتێکی میدیایی گەورەی دەوێت بۆ ڕوونکردنەوەی لایەنە ئەرێنییەکانی.
هاوكات، هەر دوێنێ، قوباد تاڵەبانی، جێگری سەرۆك وەزیرانی هەرێم لە كۆنگرەیەكی ڕۆژنامەوانیدا وتی، “توخوا واز لە مەوزوعی تەوتین بهێنن، بەڕاستی ئەزانی چۆنە، تو خوا. تو سەری من، واز لەو مەوزوعە بێنن، بابە وەڵا مێشكی ئەو میللەتەتان تێكدا. ئەمە مەوزوع نییە، موهیم ئەوەیە معاشەكە بێت، شتەكەتان وا گەورە كردووە”.
