دەزگای ئاسایشی هەرێمی کوردستان ڕایگەیاند پێنج کەسی بە تۆمەتی بازرگانیکردن بە ماددەی هۆشبەر دەستگیرکردووە کە یەکێکیان لە کاتی ڕووبەڕووبوونەوەی هێزەکانیاندا برینداربووە.
بەڕێوەبەرایەتی گشتی نەهێشتنی ماددە هۆشبەرەکانی دەزگای ئاسایشی هەرێم ڕایگەیاند، لە ڕووبەڕووبونەوەیەکدا لەناو قەزای پێنجوێن، توانیان بازرگانێکی ماددەی هۆشبەر بەبرینداری و چوار بازرگانی تر دەستگیربکەن.
لە ڕاگەیەندراوەکەدا هاتووە، ئەمڕۆ دووشەممە، “لە قەزای پێنجوێن لەسەر بڕیاری دادوەری لێکۆڵینەوەی ئاسایش، پاش ئەنجامدانی چاودێری و بەداواداچوونی ورد، بەمەبەستی دەستگیرکردنی پێنج بازرگانی ماددەی هۆشبەر، ڕووبەڕووبونەوە ڕوویدا”.
ڕوونیشیکردەوە لە ئەنجامی ڕووبەڕووبوونەوەکەدا، “بازرگانێک بەبرینداری دەستگیرکراو و چواربازرگانی دیکە دەستگیرکراون و دەستبەسەر بڕی چوار کیلۆ گرام ماددەی هۆشبەر لە جۆری کریستاڵ گیرا و تۆمەتباران ڕووبەڕووی یاسا کرانەوە”.
