فڕۆکەیەکی سەربە کۆمپانیای هێڵی ئاسمانی ئەمریکی ئەمریکان ئێرڵاینس کە گەشتی نیویۆرک-نیودەلهی ئەنجامدەدا، بەهۆی دەنگۆی بوونی بۆمب تیایدا لە فڕۆکەخانەی نێودەوڵەتی فیومیچینۆی ڕۆمای پایتەختی ئیتاڵیا نیشتەوە.
فڕۆکەکە کە لە جۆری Boeing 787-9 بوو، لە کاتێکدا بەسەر دەریای قەزوینەوە بوو، بەهۆی دەنگۆی بۆمب تیایدا، ڕاستەوخۆ ئاڕاستەکەی بەرەو ڕۆمای پایتەختی ئیتاڵیا گۆڕی.
لە نێو فڕۆکەکەدا ١٩٩ گەشتیار و ١٥ تیمی فڕۆکەوانی هەبوون.
فڕۆکەکە پێش نیشتنەوەی دوای ئەوەی چووە کایەی ئاسمانی ئیتاڵیاوە لەلایەن دوو فڕۆکەی جەنگی هێزەکانی ئاسمانیی ئیتاڵیاوە یاوەری کرا و دوای نیشتنەوەشی شوێنێکی ئەمنیی فڕۆکەخانەکە وەستا.
پاش گواستنەوەی تەواوی سەرنشینان و تیمی فڕۆکەوانی، پسپۆڕانی پووچەڵکردنەوەی بۆمب کە لە هێزە ئەمنییەکانی ئیتاڵیا پێکهاتبوو بە هاوکاری سەگی تایبەت بە دۆزینەوەی بۆمب پشکنینیان بۆ فڕۆکەکە کرد.
بەهۆی نەدۆزینەوەی بۆمب لە هیچ بەشێکی فڕۆکەکەدا باری لەناکاو کۆتایی هات و چاوەڕوان دەکرێت ئەمڕۆ فڕۆکەکە گەشتەکەی تەواو بکات و بەرەو نیو دەلهی بکەوێتەڕێ.
