ئەندامێکی لیژنەی دارایی پەرلەمانی عێراق ڕایدەگەیەنێت حکومەت دەتوانێت بە چەند ڕێگەیەک چارەسەری هەر کورتهێنانێک بکات کە لە بودجەدا دروست بێت.
ئەمڕۆ دووشەممە، جەمال کۆچەر، ئەندامی لیژنەی دارایی ئەنجومەنی نوێنەران ڕایگەیاند، حکومەتی عێراق چەند ڕێگەچارەیەکی هەیە بۆ چارەسەرکردنی هەر کورتهێنانێک کە لە بودجەدا دروست بێت.
ڕوونیشیکردەوە کە قەرزکردن لە بانکە ناوخۆییەکان یەکێکە لەو ڕێگەیانەی حکومەت دەتوانێت پەنای بۆ ببات لە کاتی دروستبوونی کورتهێناندا.
جەمال کۆچەر ڕاشیگەیاند، دوو جۆر کورتهێنان هەیە، یەکێکیان پێی دەوترێت کورتهێنانی ڕاستەقینە کە کەلێن لەنێوان داهات و خەرجیدا دروست دەبێت، دووەمیشیان کورتهێنانی گریمانەییە کە لەسەر خەمڵاندنی داهاتی چاوەڕوانکراو دروست دەبێت.
