وەزارەتی ناوخۆی هەرێمی کوردستان چەند مەرجێك بۆ ماتۆڕە دیلیڤەرییەكان دیاری دەكات و جەختدەكاتەوە، دەبێت بۆ گەیاندنی خواردن بۆ گەڕەکەکانی نێو شار ماتۆڕی کارەبایی و بێدەنگ بەکاربهێنرێت.
وەزارەتی ناوخۆی حكومەتی هەرێمی کوردستان، لە گشتاندنێكدا، كە وێنەی دەست (خەڵك) كەوتووە، ڕایگەیاندووە، پابەند كردنی ماتۆڕسواران گەیاندنی خواردن بە تۆماركردنی ماتۆڕەكانیان لەلایەن بەڕێوەبەرایەتییەكانی هاتووچۆ و دەرهێنانی مۆڵەتی ماتۆڕسواری لەماوەی 6 مانگدا.
ڕاشیگەیاندووە، “هەر ماتۆڕێک مەرجی سەلامەتی تێدا نەبێت، نابێت کۆمپانیا دەرفەتی کاری پێبدات. بەپێچەوانەوە، کۆمپانیا بەرپرسیارێتیی سەرپێچی و سزا داراییەکانی ماتۆڕی نەناسراو و تۆمارنەکراو هەڵدەگرێت.”
ڕاشیگەیاندووە، “ئەو ماتۆڕسوارانەی لە رابردوودا لە کۆمپانیاکان کاریان کردووە، سەرپێچیی هاتووچۆیان کردووە و سزایان هاتووەتە سەر، بە ناسینەوەی لۆگۆی تایبەتی کۆمپانیا بەرپرسیاری کەمتەرخەمی دەکەوێتە ئەستۆی کۆمپانیاکان و ڕەزامەندین بڕی پارەی سزای سەرپێچییەکان بدرێت بەداشکانەوە، تاوەکو کۆتایی ئەم ساڵیش ئەم دەرفەتە بەردەوام دەبێت. هاوکات دەتوانن بە پشک (قسگ) پارەی سزاکان بدەن”.
بۆ رەچاوکردنی دۆخی دەروونیی هاونیشتمانیان و پاراستنی ژینگە، وەزارەتی ناوخۆ داوا دەکات، “پێویستە هەوڵ بدرێت بۆ گەیاندنی خواردن بۆ گەڕەکەکانی نێو شار ماتۆڕی کارەبایی و بێدەنگ بەکاربهێنرێت؛ گشت ماتۆڕەکان بێزارکەر نەبن.”
سەبارەت بە سەلامەتی ماتۆڕسوار، لە گشتاندنەكەدا هاتووە، “پێویستە کڵاو لەسەر بکەن و جلوبەرگی تایبەت بپۆشن. هەر کۆمپانیایەک پێویستە جلوبەرگی تایبەتی خۆی هەبێت؛ تەنیا ماتۆڕسوارەکان دەستیان بگاتە ئەو جلوبەرگە؛ باجی تایبەتیان لە یەخە بدرێت کە ناوی سیانی و کۆدی کۆمپانیای لەسەر بێت.”
