بافڵ تاڵەبانی ڕایدەگەیەنێت کە لە میانی کۆبوونەوەی لەگەڵ مەسرور بارزانی باسیان لە (هەژماری من) کردووە و پرۆژەکەش هەڵمەتێکی میدیایی گەورەی دەوێت بۆ ڕوونکردنەوەی لایەنە ئەرێنییەکانی.
ئەمڕۆ یەکشەممە، بافڵ تاڵەبانی، سەرۆکی یەکێتیی نیشتمانیی کوردستان لە کۆنگرەی دیالۆگی نێودەوڵەتی لە بەغداد دەربارەی پرسی (هەژماری من) و (تەوتین) ڕایگەیاند، پێش سەردانەکەم بۆ واشنتۆن، لەگەڵ مەسرور بارزانی، سەرۆکی حکومەتی هەرێمی کوردستان کۆبوومەوە و زۆر بابەتمان باس کرد و یەکێکیان هەژماری من و تەوتین بوو.
بە پێی وەرگێڕانی ڕاستەوخۆی کەناڵ8 بۆ دیالۆگەکە، بافڵ تاڵەبانی وتیشی: “کاک مەسرور تیمێکی هەژماری منی نارد بۆ سلێمانی و لەگەڵ پسپۆرە یاسایی و داراییەکانمان دانیشتن و تەماشای وردەکاری جیاوازییەکانی نێوان تەوتین و (هەژماری من)یان کردووە، دەرفەتێک لە ئارادایە بتوانین بەشێوازێک ڕوونی بکەینەوە و تێگەیشتن لێی ئاسانتر بکات”.
بافڵ تاڵەبانی ڕاشیگەیاند “ئەم پرۆگرامە پێویستی بە هەڵمەتێکی میدیایی گەورە هەیە بۆ هۆشیارکردنەوەی هاووڵاتییان و ڕوونکردنەوەی لایەنە ئەرێنییەکانی پرۆژەی هەژماری من و دەتوانین ئەوە بکەین”.
