لە دوو قەزای دیكەی هەرێم كرا بە پشوو

دوابەدوای تەوێڵە و بیارە، لە هەردوو قەزاكانی پێنجوێن و چۆمان بڕیار درا سبەینێ‌ بكرێتە پشووی فەرمی.

هێمن ئیبراهیم، قائیمقامی قەزای پێنجوێن لە ڕاگەیەنراوێكدا ئاماژەی بەوەكردووە، بەهۆی نزم بوونەوەی پلەکانی گەرما لەسنوری قەزاکەماندا. بەڕاوێژ لەگەڵ بەڕێوەبەرایەتی پەروەردەی پێنجوێن بڕیارماندا سبەینێ ڕێکەوتی (23-2-2025) ڕۆژی (یەک شەممە) پشووی فەرمی بێت لەسەرجەم خوێندنگاکانی سنوری هەردوو ناحیەی گەرمک و ناڵپارێز و ناو قەزای پێنجوێن.

ڕاشیگەیاندووە، جگە لەو خوێندکارانەی تاقیکردنەوەی بەرایی (تمهیدی) پۆلە ناکۆتاکانیان هەیە.

لای خۆشیەوە، قائیمقامیەتی قەزای چۆمان بڵاویكردەوە، ئەو شەپۆلە بەفربارینەی سنوری قەزای چۆمان و ناحییەکانی گرتۆتەوە، بەهۆی مەترسی هاتووچۆکردنی قوتابییان و پاراستنیان، لە شەختە و بەفر و مەترسیی هاتووچۆ، لەسنوری قەزای چۆمان و ناحیە و گوندەکان.

ڕاشیگەیاندووە، بەهۆکاری ئەگەری دروست بوونی شەختە، بەتایبەت لە بەشێکی زۆری سنوری قەزاکەمان، بەپێی پێشبینییە کەشناسییەکان، لە پێناو بەرژەوەندی گشتی بۆ سەلامەتی مامۆستا و قوتابیان و شوفێرانی تایبەت بە گواستنەوەی قوتابیان، لەسەر راسپاردەی قائیمقامی قەزا (ئەحمەد بارزان عەلی) بڕیاردرا بە پشووی فەرمی لە سەرجەم قوتابخانەکانی (حکومی ) و پەیمانگەکانی سنوری بەڕێوەبەرایەتیی پەروەردەی چۆمان، جگە لەو قوتابیانەی کە بەشداری ئەزموونە دەرەکییەکان دەکەن.

جەختیشی كردۆتەوە، ڕۆژی یەک شەممە ڕێکەوتی (٢٠٢٥/٢/٢٣ ) پشووی فەڕمی ناوەندەکانی خوێندن دەبێت.