مامۆستایەكی زانكۆ سەبارەت بە خۆپیشاندانی مامۆستایانی ناڕازی بۆ ڕێگری لە تانكەرە نەوتەكان پەیامێك بڵاودەكاتەوە و ڕایدەگەیەنێت، بە سەرمایەدارەکە ناوێرن، چونکە پیاوی دەسەڵاتە، بەڵام بە کاسبکارەکه دەوێرن.
گوڵاڵە سدیق، مامۆستای زانكۆ و شارەزای دارایی لە پەیامەكەیدا ئاماژەی بەوەكرد، “مامۆستایانی بەڕێز، جەنابتان بۆ بژێوی لەسەر جادەن و چەندین ساڵە خەباتی بۆ دەکەن، بەڵام ئێستا جەنابتان بەو کارە ڕێگری لە بژێوی چەندین خێزان دەگرن و قوتیان دەبڕن لەکاتێکدا ئەو خاوەن تەنکەرانە مرۆڤی سەربەرزن و بە عارەقەی نێوچەوانی خۆیان ماڵ و منداڵیان دەژێنن بەبێ ئەوەی چاوەڕوانی مووچە لە حکومەت بکەن!”.
ڕاشیگەیاندووە، ئەو تەنکەرە نەوتانە چەندین تۆن سووتەمەنیان تێدایە و هەر کارێکی هەڵە لەوانەیە ببێتە هۆی سووتاندن و زیان پێگەیاندن و کارەساتی گەورە بخوڵقێنێت!
ئەو مامۆستایە دەڵێت: “ئەگەر ڕاست دەکەن فەرمون بچنە بەردەم کۆمپانیا نەوتییەکان لەوێوە مەهێڵن ئەو نەوتە بدرێت بە تەنکەرەکان”.
جەختیشدەكاتەوە، قادرمە لەسەرەوە پاک دەکرێتەوە، خێرە جەنابتان ناچنە بەردەم کۆمپانیاکان و ڕێگری لەوان ناکەن، کە نەوتەکە نەفرۆشێت بە تەنکەرەکان، بەڵام کاتێک ئەم نەوتە دەبێتە موڵکی مرۆڤێکی مەدەنی ئینجا دەچن ڕێگری دەکەن؟!
گوڵاڵە سدیق بە مامۆستایانی ناڕازی دەڵێت: “حەیفە جەنابتان بۆ بژێوی لەسەر جادەن، بەڵام دەچن بژێوی کەسانێک دەبڕن، کە چاویان لە مووچە و دامەزراندن نییە و نەبووە، بە سەرمایەدارەکە ناوێرن چونکە پیاوی دەسەڵاتە، بەڵام بە کاسبکارەکه دەوێرن”.
