مامۆستایان و فەرمانبەرانی ناڕازی هەڵوێستیان لەسەر بایکۆت ڕاگەیاند و دەڵێن”بایکۆت بڕیاری خۆڕسکانەیە و یەک شەممە چالاکی ترمان دەبێت”.
مامۆستایان و فەرمانبەرانی ناڕازی، لەکۆنگرەیەکی ڕۆژنامەوانیدا لەبەردەم لە بەردەم نوسینگەی بانکی ڕەشید و ڕافیدەین لە سلێمانی ڕایانگەیاند، ماوەی چەندین ساڵە مووچەخۆرانی هەرێم دووچاری قەیران و دابەشنەکردن و دواکەوتنی مووچەکان دەبنەوە، ئەمە جگەلەوەی لەساڵی 2016 پلەبەرزکردنەوە راگیراوە، بۆیە لەم ساتەدا لە سنووری سلێمانی و ئیدارەی گەرمیان و ڕاپەڕین و پارێزگای هەڵەبجە و قەزای کۆیەی سەربە پارێزگای هەولێر دەرگای قوتابخانەکان داخراوە.
ئاماژەیان بەوەشداوە، ئەمڕۆ ساڵێک بەسەر بڕیارە مێژووییەکەی دادگای باڵای فیدڕاڵی تێدەپەڕیت تایبەت بە پرسی تەوتینی مووچەی فەرمانبەران، بەداخەوە بەهۆی گەندەڵی و ناشەفافیەوە و ڕیگری لە تەوتینی ڕاستەقینە لەبانکە حکومییەکانی عێراق مووچەی مانگی 12 ساڵی ڕابردوو دابەشنەکراوە.
ڕاشیانگەیاند، هۆکاری سەرەکی گرفتەکان ئەنجامنەدانی تەوتینی مووچەکانە لەسەر بانکە حکومییەکانی عێراق، ئەمەش نەک گرفتەکەی چارەسەر نەکرد بەڵکو قوڵتری کردۆتەوە.
هاوکات مامۆستایان و فەرمانبەرانی ناڕازی دەشڵێن، هەژماری من ڕەتدەکەینەوە و متمانەمان پێی نییە و مووچەی چەندین مانگ نەدراوە و داواکارین هاوشێوەی عێراق تەوتینی مووچەمان بکرێت، بەشێوەیەک بێت ڕاستەوخۆ لە دارایی عێراق بێت بۆ سەر هەژمارەکانمان.
هاوکات داواکارن لەم سەنتەرە بازرگانییە نوێیە لەڕێگەی نوسینگەکانی ڕەشید و ڕافیدەین لەسلێمانی تەوتینی مووچەکانیان دەستپێبکات.
هەر لە بەیاننامەکەدا مامۆستایان و فەرمانبەرانی ناڕازی پەیامیان بۆ دەسەڵاتدارانی یەکێتی نارد و دەڵێن”دەسەڵاتدارانی ئەم زۆنە لەژێر هیچ بیانویەک هەژماری من بە مووچەخۆران پڕنەکەتەوە و دەبێت خۆیان یەکلایی بکەنەوە یان هەژماری من یان تەوتین”.
لەکۆتایی بەیاننامەکەدا هاتووە، بایکۆت بڕیاری مامۆستایان و ڕەتکردنەوەی کۆیلایەتییە، و بۆهیچ لایەنێک نییە لەژێر هیچ فشار و بەڵێنیکی ساختە بایکۆت بشکێنێ، و ڕۆژی یەک شەممە چالاکی جۆراوجۆرمان دەبێت لەسەرجەم شار و شارۆچکەکان بۆ دەرخستنی بڕیاری خۆرسکانەی بایکۆت.
