ئیلهام ئەحمەد ڕایدەگەیەنێت، ئاوارەكانی عەفرین و سەرێ كانی و گرێ سپی لە دۆخێكی مەرگەساتدا دەژین و دەشڵێت: دیالۆگی نیشتمانی لەنێوان هەموو سوورییەكان تاكە ڕێگایە بۆ بەدیهێنانی ئاشتی بەردەوام.
ئیلهام ئەحمەد، هاوسەرۆكی پەیوەندییەكانی دەرەوەی ئیدارەی خۆسەری ڕۆژئاوای كوردستان ڕایگەیاندووە، باوەڕمان بەوەیە، كە دیالۆگی نیشتمانی گشتگیر لەنێوان هەموو سوورییەكان تاكە ڕێگایە بۆ بەدیهێنانی ئاشتییەكی بەردەوام بەدەر لە چارەسەری سەربازی، كە شكستی هێناوە لە كۆتایی هێنان بە قەیرانەكان.
ڕاشیگەیاندووە، لە ساڵی 2011ەوە هەوڵ دەدەین بۆ چەسپاندنی ڕۆشنبیری دیالۆگ و بۆ ئەوەش چەندین كۆنگرە و كۆبوونەوەی ڕاوێژكاری ئەنجامدراوە بە ئامانجی دۆزینەوەی چارەسەری سیاسی، كە مافی هەموو سوورییەكان بەدی بهێنێت بەبێ پەراوێزخستنی كەس.
ئاماژەی بەوەشكردووە، پێشوازی لە سەردانی ئەحمەد شەرع دەكەین بۆ عەفرین و ئەوە بە هەنگاوی ئەرێنی دەبینین بۆ بەهێزكردنی هەوڵەكان بۆ گێڕانەوەی ئاوارەكان بەشێوەیەكی سەلامەت.
ئیلهام ئەحمەد وتیشی، “تا ئێستا دۆسیەی ئاوارە زۆرەملێكان لە ناوچە جیاوازەكانی سووریا یەكێكە لە زۆرترین دۆسیەكان، كە پێویستی بە ڕێككردنەوەیە لەڕووی سیاسی و مرۆییەوە، چونكە بە هەزاران سووری بەهۆی پڕۆسە سەربازییەكانەوە ناچار بە ئاوارەبوون كراون و تا ئێستا لە خێمە و كەمپەكان لەناو سووریا و دەرەوە ماونەتەوە و لە ژیانێكی زۆر خراپدا دەژین”.
جەختیشی كردەوە، ئاوارەكانی عەفرین و سەرێ كانی و گرێ سپی لە دۆخێكی مەرگەساتدا دەژین، كە بەهۆی پڕۆسە سەربازییەكانەوە ناچار بە ئاوارەبوون بوون و بۆتە هۆی گۆڕینی دیمۆگرافیای ناوچەكە، كە ئەوەش كاریگەری لەسەر سەقامگیری كۆمەلایەتی هەیە.
هاوسەرۆكی پەیوەندییەكانی دەرەوەی ئیدارەی خۆسەر ئەوەشی دووپات كردەوە، كە بەهیچ شێوەیەك ئەوە قبوڵ ناكەن، كە نەوەیەك لە منداڵان لەناو خێمە و كەمپەكان ژیان ببەنەسەر.
