سعودیە نێوەندگیری لەنێوان ئیدارەی خۆسەر و حکومەتی نوێی سووریا دەکات.
ناوەندی ڕاگەیاندنی هێزەکانی سووریای دیموکرات “هەسەدە” بڵاویکردەوە، بڕیارە سعودیە نێوەندگیری لە نێوان ئیدارەی خۆسەر و دیمەشق بکات، هاوکات نوێکردنەوەی گرێبەستی دابینکردنی غازی شل بۆ وێستگەکانی بەرهەمهێنانی کارەبا بە پشتیوانی ئەمریکا دابیندەکرێت، و ئەمەش بەرهەمهێنان و پێدانی کارەبا زیاد دەکات.
بەپێی ناوەندەکە، شانشینی سعودیە چووەتە ناو هێڵی نێوەندگیری نێوان ئیدارەی خۆسەر لە باکور و ڕۆژهەڵاتی سووریا و دیمەشق، لە ڕێککەوتنێکدا بە ئامانجی نوێکردنەوەی گرێبەستی دابینکردنی غاز لە ناوچەکانی جەزیرە بۆ وێستگەکانی کارەبا لە حمس و دیمەشق.
بەگوێرەی زانیارییە بڵاوبووەکان، ئەم ڕێککەوتنە کە بەنێوەندگیری سعودیە بووە، بووە هۆی زیادبوونی کاتژمێرەکانی پێدانی کارەبا بە بڕی 4 کاتژمێر لە ڕۆژێکدا، هاوکات پێشبینی دەکرێت لەمانگی ڕەمەزانی پیرۆزدا پێدانی کارەبا بۆ هەشت کاتژمێر لە ڕۆژێکدا بەرزبێتەوە.
ناووەندی ڕاگەیاندنی هەسەدە ڕوونیشیکردەوە، ئەم هەنگاوە بەپشتیوانی ئەمریکایە، ئەمەش رەنگە ببێتە هەنگاوێک بۆ گۆڕینی هاوسەنگی لە سیاسەتی نوێی سووریا و بەرژەوەندییە ئابوورییەکان و تەرازوی هێزی لایەنەکان لە سووریا دەربخات.
