بریکاری پێشووتری وەزارەتی دارایی عێراق ڕایگەیاند بە پێی بڕیارەکەی دادگای فیدراڵی “هەژماری من” بووەتە تەوتین و هیچ جیاوازییەکایان نییە.
ئەمڕۆ چوارشەممە، فازڵ نەبی، بریکاری پێشووتری وەزارەتی دارایی عێراق دەربارەی بڕیارەکەی دوێنێی دادگای فیدراڵی سەبارەت بە سکاڵاکەی سەرۆک کۆمار ڕایگەیاند، بڕیارەکەی دادگای فیدراڵی داننانە بە هەژماری مندا.
ڕوونیشیکردەوە کە سەرەتا دادگای فیدراڵی ڕایگەیاندبوو کە دەبێت فەرمانبەران لە بانکە فیدراڵییەکانی دەرەوەی هەرێمی کوردستان هەژمار بکەنەوە، بەڵام لە ڕوونکردنەوەکەی دواتر و بڕیارەکەی دوێنێشدا دەڵێت تەوتین لە هەموو ئەو بانکانەدا دەکرێت کە لەلایەن بانکی ناوەندیی عێراقەوە مۆڵەتیان پێ دراوە.
فازڵ نەبی ڕاشیگەیاند، هەژماری من لە هەرێمی کوردستانیش هەر بەو شێوەیە بەڕێوەچووە، بۆیە “هەژماری من” بووەتە تەوتین و هیچ جیاوازییان نییە و تەنها ئەوەیە ناوەکەیان جیاواززە.
ئەوەشی خستەڕوو کە دەبێت هەژماری من پەلە بکات لە کردنەوەی هەژمار بۆ فەرمانبەران و بە دوورینەزانی لە داهاتوودا مووچەی ئەو فەرمانبەرانە ڕابگیرێت کە هەژماریان نەکردووەتەوە.
