هێزەکانی سووریای دیموکرات ئامادەیی بۆ تێکەڵکردنی هێزەکانی لەگەڵ سوپای نوێی سووریا دەردەبڕێت و پێشنیازکراوە بکرێتە فەرماندەیی ڕۆژهەڵاتی سوپاکە.
لە کۆبوونەوەیەکی هاوبەشی هێزەکانی سووریای دیموکرات “هەسەدە”، ئەنجومەنی سووریای دیموکرات “مەسەدە” و ئیدارەی خۆسەردا ڕەزامەندی درا لەسەر تێکەڵکردنی دامەزراوە سەربازی و ئەمنییەکان لەگەڵ سوپای نوێی سووریا و کاراکردنەوەی دامەزراوە مەدەنی و خزمەتگوزارییەکانی سەر بە دەوڵەت لە باکووری ڕۆژهەڵاتی سووریا.
لای خۆشیەوە ئەبو عومەر ئیدلیبی، سەركردە لە هێزەکانی سوریای دیموكرات بە رۆژنامەی شەرقولئەوسەتی ڕاگەیاند، لە کۆبوونەوەکەدا بڕیاریانداوە “هەسەدە” وەك هێزێك ببێتە بەشێک لە وەزارەتی بەرگری حکومەتی دیمەشق، دەشكرێت لە چوارچێوەی فەیلەق یان فەرماندەیی ناوچەی ڕۆژهەڵاتی وەزارەتەکەدا بێت و گفتوگۆکان هێشتا لە قۆناغی سەرەتادایە.
ئەوەشی خستەڕوو لە پرسی کێڵگە نەوتی و غازییەکانی باکووری رۆژهەڵاتی سوریا، بەشێک نییە لە گفتوگۆکانی ئەم قۆناغە و ڕەنگە لە قۆناغەکانی داهاتوودا باسیان لێبکرێت.
