کەشناسی هەرێمی کوردستان ڕایگەیاند لە ئەنجامى یەکگرتنى دوو نزمە پاڵەپەستۆى دەریاى ناوەڕاست و دەریاى سوور، شەپۆلێکی بەفر و باران هەرێم دەگرێتەوە و بەفریش لە سەنتەری شارەکان دەبارێت.
ئەمشەو بەڕێوەبەرایەتی گشتی کەشناسی و بوومەلەرزەزانی هەرێمی کوردستان ڕایگەیاند، پێشبینی هاتنى شەپۆلى باران و بەفر دەکرێت و بەو هۆیەوە ناوچەکەمان دەکەوێتە ژێر کاریگەرى شەپۆلێکى بارانبارین و بەفربارین و نزمبوونەوەى پلەکانى گەرما.
ڕوونیشیکردەوە کە کاریگەرى ئەم کەشە زستانیە بۆ ماوەى چەند ڕۆژێک لە درەنگانى شەوى چوارشەممە تا ڕۆژى یەکشەممە بەردەوام دەبێت، ئەویش لە ئەنجامى یەکگرتنى دوو نزمە پاڵەپەستۆى دەریاى ناوەڕاست و دەریاى سوور زۆرترین کاتى دابارین لە ڕۆژى پێنج شەممە پێشبینی دەکرێت.
کەشناسی هەرێمی کوردستا ڕاشیگەیاند، لەگەڵ دەستپێکردنى بارانبارین لەسەر ناوچە سنوورییەکان بەفر بارینیش دەست پێ دەکات، پاشان لە ئەنجامى هاتنى بارستە هەواییەکى ساردتر بەفربارین لەسەر ناوچە شاخاوییەکان و نیمچە شاخاوییەکان و سەنتەر و قەزاى ناوچە شاخاوییەکان و سەنتەرى پارێزگاى دهۆک و سلێمانى و هەڵەبجە و ئیدارەى ڕاپەڕین و زاخۆ دەبارێت.
لە ڕاگەیەندراوەکەی کەشناسیدا هاتووە کە “لەگەڵ نزمبوونەوەى زیاترى پلەکانى گەرما بەفربارین تا ئاستى 600 مەتر بە تێکەڵى لەگەڵ باران دەبارێت”.
