سەرۆکی هەرێمی کوردستان رایدەگەیەنێت کە دەبێت پارتی کرێکارانی کوردستان پێشوازی لە پەیامەکەی عەبدوڵا ئۆجالان بکات و چەک دابنێت، بەڵام ئەوە بە مانای تەسلیمبوون نایەت.
نێچیرڤان بارزانی، سەرۆکی هەرێمی کوردستان لەمیانی چاوپێکەوتنێکی لەگەڵ کەناڵی ڕووداودا ڕایگەیاند، ئێمە ئامادەین کار بۆ سەرخستنی پرۆسەی ئاشتی بکەین لە تورکیا، پێشتریش چەندین دیدارمان لە ئەنقەرە لەسەر پرۆسەی ئاشتی کردووە.
بارزانی بە پێویستیزانی پارتی کرێکارانی کوردستان چەک دابنێت و وتیشی: “چەکدانان بەمانای تەسلیمبوون نییە و دەبێت پەکەکە پێشوازی لە پەیامەکەی ئۆجالان بکات”.
ئەم لێدوانەی سەرۆکی هەرێمی کوردستان لە کاتێکدایە کە سێ ڕۆژە ئەو شاندەی دەم پارتی کە دوو جار سەرجانی عەبدوڵا ئۆجالانیان کردبوو، لە هەرێمی کوردستانن و زنجیرەیەک دیداریان لەگەڵ بەرپرسانی پارتی دیموکراتی کوردستان و یەکێتیی نیشتمانیی کوردستان ئەنجامدا بۆ گەیاندنی هەڵوێستی ئۆجالان دەربارەی پرۆسەی ئاشتی و وەرگرتنی ڕای ئەو دوو لایەنە لەسەر پرۆسەکە.
نێچیرڤان بارزانی لە بەشێکی دیکەی چاوپێکەوتنەکەدا باسی لە پرسی کورد لە سووریا کرد و ڕایگەیاند، “دەرفەتێکی باش لە سووریا هەیە و دەبێت یارمەتی دەربین و بە برا کوردەکانمان وتووە لە سووریا دەبێت خاوەن ماڵ بن نەک میوان، چونکە گەلی سووریا شایستەی ژیانێکی باشترن”.
سەرۆکی هەرێمی کوردستان جەختی لەوەشکردەوە کە پێویستە هەموو پێکهاتەکان لە سووریای نوێدا بەشداربن.
