جێگری سەرۆك وەزیرانی هەرێمی كوردستان ناوەڕۆكی كۆبوونەوەی شاندی ئیمڕالی لە دەباشان لەگەڵ شاندی یەكێتی بە سەرۆكایەتی بافڵ تاڵەبانی ئاشكراكرد و دەڵێت: یەكێتی هەر ئەرکێکی نەتەوەیی بکەوێتە سەرشانی بە شانازییەوە جێبەجێی دەکات.
قوباد تاڵەبانی، جێگری سەرۆك وەزیرانی هەرێم لە ڕاگەیەنراوێكدا سەبارەت بە كۆبوونەوەكە ڕایگەیاند، یەکێتیی نیشتمانیی کوردستان لە بەر ڕۆشنایی ڕێبازی سەرۆک مام جەلال ڕوانگەیەکی ڕوون و چەسپاوی هەیە بۆ چۆنییەتی چارەسەرکردنی پرسی کورد لە تورکیا.
ڕاشیگەیاندووە، وەک هەمیشە بە هەموو توانایەوە پشتگیری لە چارەسەری ئاشتییانەی پرسی کورد دەکات و لەم چوارچێوەیەدا هەر ئەرکێکی نەتەوەیی بکەوێتە سەرشانی بە شانازییەوە جێبەجێی دەکات.
ئاماژەی بەوەشكردووە، ئەمڕۆ لە کۆبوونەوە لەگەڵ شاندی ئیمڕاڵی بە سەرۆکایەتی پەروین بوڵدان و سری سورەیا ئوندەر، بافڵ جەلال تاڵەبانی، سەرۆکی یەکێتیی نیشتمانیی کوردستان پابەندیی یەکێتی بە سیاسەت و ڕوانگەی سەرۆک مام جەلال بۆ پشتیوانیکردن لە چارەسەری ئاشتییانەی پرسی کورد لە تورکیا دووپات کردەوە و ئامادەیی یەکێتی بۆ هەموو جۆرە هاوکاری و پشتیوانییەک لەپێناو چەسپاندنی ئاشتی و دابینکردنی مافەکانی گەلی کورد لە تورکیا دەربڕی.
