وەزیری بەرگری عێراق داوا دەکات دۆسیەی سەرگەڕان لە سوپا وەربگیرێتەوە و فراکسیۆنی یەکێتیش ڕەتیکردەوە پێشوازی لە فەرماندەی ئەو هێزە بکات کە دوێنی پەلاماری جووتیارانی کوردیان دا.
کاروان یاروەیس، ئەندامی ئەنجومەنی نوێنەران لە ناحیەیە سەرگەڕانەوە ڕایگەیاند، ئەمرۆ وەزیری بەرگری لەگەڵ سەرۆک وەزیرانی عێراقدا قسەی کردووە و داوای لێکردوە کە دۆسیەی سەرگەران و ئەو ناوچانە لە سوپا وەربگیرێتەوە و بدرێتە وەزارەتی ناوخۆ.
وتیشی: “وەزیری بەرگری نیگەرانە لەوەی بەهۆی ڕووداوەکانی سەرگەرانەوە، سوپا بە خراپی ناوی دەهێنرێت و لە بەغداد فشاریان کراوەتە سەریان و داوای بانگکردنی بۆ پەرلەمانی عێراق دەکرێت”.
کاروان یاروەیس ڕاشیگەیاند، دوێنێ پەیامی نیگەرانی یەکێتی گەیەنراوەتە محەمەد شیاع سوودانی و ئەمرۆ د. خالید شوانی، وەزیری داد لەگەڵ سوودانی کۆدەبێتەوەو بڕیار دەربارەی ئەو ڕاسپاردە و پێشنیازانە دەدرێت کە خراونەتەڕوو بۆ چارەسەرکردنی کێشەکە.
ڕوونیشیکردەوە کە پێشنیاز کراوە ئەو زەوی و زارانەی بڕیاری دادگایان لەسەرە جارێ ئیشکردن تیاندا دەوەستێ، بەڵام زەوی و زارەکانی تر جووتیاران دەتوانن بیکێلن.
کاروان یاروەیس ئەوەشی خستەڕوو لە ئەمرۆ لەسەرگەران، فراکسیۆنی یەکێتی ئامادەنەبوون پێشوازی لە فەرماندەی فیرقەی هەشتی سوپا بکەن، بەهۆی نیگەرانی جووتیاران و هەڵسوکەوتی نەشیاوی سوپا لە ناوچەکەدا.
