سەرۆکی حکومەتی هەرێمی کوردستان و جێگری وەزیری دەرەوەی تورکیا جەخت لە پێویستیی دەستپێکردنەوەی هەناردەکردنی نەوتی هەرێمی کوردستان دەکەنەوە.
ئەمڕۆ سێشەممە، مەسرور بارزانی، سەرۆکی حکومەتی هەرێمی کوردستان پێشوازی لە بێریس ئیکینجی، جێگری وەزیری دەرەوەی تورکیا و شاندێکی یاوەری کرد.
مەسرور بارزانی دەربارەی دیدارەکە پەیامێکی بڵاوکردەوە و ڕایگەیاند، لە کۆبوونەوەکەدا بیروڕامان لەبارەی دەرفەتەکانی پەرەپێدانی پەیوەندیی دوولایەنە ئاڵوگۆڕ کرد ، بە تایبەتی لە بوارەکانی ئاڵوگۆڕی بازرگانی و وزەدا.
وتیشی: “هاوڕابووین لەسەر پێویستیی دەستپێکردنەوەی هەناردەکردنی نەوتی هەرێمی کوردستان لە ڕێگەی بەندەری جەیهان، بە تایبەتی دوای پەسەندکردنی هەمواری یاسای بودجەی فیدراڵ لە لایەن ئەنجومەنی نوێنەرانەوە، تایبەت بە تێچووی دەرهێنان و گواستنەوەی نەوتی هەرێم”.
ئەوەشی خستەڕوو کە گفتوگۆیان لەبارەی پڕۆژەی ڕێگەی گەشەپێدان و بەستنەوەی وڵاتانی کەنداو و عێراق بە تورکیا و ئەورووپا لە ڕێگەی هێڵی ئاسنین کرد، “لەمبارەیەوە، جەختمان لە گرنگیی بەشداریی هەرێمی کوردستان لەم پڕۆژە ستراتیژییەدا کرد”.
مەسرور بارزانی وتیشی: “لە بەشێکی دیکەی کۆبوونەوەدا، گۆڕانکاریی و پێشهاتەکانی دۆخی سووریامان تاوتوێ کرد و پێویستیی پاراستنی ئاسایش و سەقامگیریی سووریا و دەستەبەرکردنی مافەکانی گەلی کورد و گشت پێکهاتەکانمان دووپات کردەوە”.
