فراکسیۆنی یەکگرتوو لەبارەی ئاڵۆزییەکانی ئەمڕۆی سوپای عێڕاق و جوتیارانی کورد پەیامیکی بڵاوکردەوە و دەڵێت” ئەو جۆرە ڕەفتارانە سەرکۆنە و ڕیسوا دەکەین”
دەقی پەیامەکەی فراکسیۆنی یەکگرتوو:
بەناوی خوای گەورە و میهرەبان.
هەموو دەزانین لەعێراقدا و بۆ چەند دەیەیەک ڕژێمی پێشووی بەعس ستەمکارانه چەندین پرۆسەی ناڕەوای وەکو تەعریبکردن و بەزۆر کۆچپێکردن و داگیرکردنی زەوی و زاری کوردی ئەنجامدا، بڕیاربوو پاش ڕوخانی ئەو ڕژێمە شۆڤێنییە ماف بۆ مافخوراوان بگەڕێنرێتەوە، لەگەڵ ئەوەی ئەو پرۆسەیە سەبارەت بەزەوی و زاری جوتیارانی کورد دواکەوت؛ بەڵام ماوەیەک پێش ئێستە و لە ئەنجومەنی نوێنەرانی عێراق و بەدەنگی زۆرینە ئەو بڕیارە ناڕەوایانەی تایبەت بوو بە زەوی جوتیارانی کورد و زەوییە زەوتکراوەکان هەڵوەشێنرایەوە و ئەو مافەیان بۆ گەڕێنرایەوە.
دوای دەستوەردانی بەشێک لەسوپای عێراق و ڕێگریی لە خاوەن زەوییەکان و بینینی ئەو هەڵسوکەوت و دیمەنە نەشیاوانەی بەرامبەر بە بەشێکی خاوەن زەوییەکان کرا؛ ئێمە لە فراکسیۆنی یەکگرتووی ئیسلامیی کوردستان ئەو جۆرە ڕەفتارانە سەرکۆنە و ڕیسوا دەکەین و دەخوازین بە زوترین کات لایەتە پەیوەندیدارەکان بێنە سەر خەت و چیدی سووکایەتی بەخاوەن مافەکان نەکرێت کە بۆ هەزاران ساڵە لەسەر زەوی باووباپیرانیان ژیاون.
فراکسیۆنی یەکگرتووی ئیسلامیی کوردستان- پەڕلەمانی کوردستان ١٧-٢-٢٠٢٥
