یەکێتی ڕاگەیەندراوێکی لەبارەی گرژییەکانی گوندی سەرگەران و ناوچەکانی دەوروبەری بڵاوکردەوە و دەڵێت” ئیشی سوپا نییە بەشێك بێت لەگرفتە ناوخۆییەكان و چارەسەری ململانێكانی زەویوزار”.
یەکێتی نیشتیمانی کوردستان، ڕاگەیەندراوێکی بڵاوکردەوە و رایگەیاند، یەكێتیی نیشتمانیی پێیوایە ئیشی سوپا نییە بەشێك بێت لەگرفتە ناوخۆییەكان و چارەسەری ململانێكانی زەویوزار و موڵكداریش هەرگیز بەبەكارهێنانی ناڕەوای هێزو پەلاماردانی هاووڵاتیان سەرناگرێت و رێگا دروستەكەی چارەسەری ناكۆكی لەسەر موڵكوماڵ نییە.
ئاماژەی بەوەشداوە، خۆهەڵقورتاندنی هێزەكانی سوپای لە كێشەی زەویوزار لە ناوچەیەكی هەستیاری وەكو ناوچە دابڕاوەكانی كەركوك هیچ ژینگەیەكی تەندروست بۆ بەرقەراركردنی یاساو دەستوور دابین ناكات، بەڵكو ئاڵۆزتریشی دەكات.
جەختیشدەکاتەوە، ئەركی سەرۆكوەزیرانی حكومەتی ئیئتلافیشە روونتر ئەم بەرپرسیارێتییە نیشتمانیی و دەستورییە بگرێتە ئەستۆو بە هیممەتتر لەسەری بێتە جواب.
دەقی راگەیەندراوەكەی مەكتەبی سیاسی:
یەكێتیی نیشتمانیی كوردستان داوا لە حكومەتی ئیتحادی دەكات رێگا لەدەستوەردانەكانی هێزەكانی سوپا بگرێت لەكەیسی زەویوزاری دێهاتەكانی كەركوك و دەوروبەری و فەرمان بە یەكەكانی سوپای وڵات بكات پابەندی بەرپرسیارێتی نیشتمانی و دەستوری خۆی بێت لەدەستوەرنەدان لەگرفتە ناوخۆییەكانی ناو كۆمەڵگەی عیراقی و پێكهاتەكانی.
یەكێتیی نیشتمانیی پێیوایە ئیشی سوپا نییە بەشێك بێت لەگرفتە ناوخۆییەكان و چارەسەری ململانێكانی زەویوزار و موڵكداریش هەرگیز بەبەكارهێنانی ناڕەوای هێزو پەلاماردانی هاووڵاتیان سەرناگرێت و رێگا دروستەكەی چارەسەری ناكۆكی لەسەر موڵكوماڵ نییە، چونكە لایەنگیری دامەزراوەكانی دەوڵەت، بەتایبەتیش سوپا كە ئەركی پاراستنی سنوورەكانی وڵاتە، بۆ هەر لایەنێك لەهەر ململانێیەكی ناوخۆییدا پێشینەیەكی مەترسیدارەو پێشێلكردنی دەستوریی وڵاتیشە، هەروەك پێشێلكردنی یاسا پەسەندكراوەكانی ئەنجومەنی نوێنەرانیشە كە تازەكیی بڕیارەكانی رژێمی پێشووی بەعسی لەسەر موڵك و زەویوزاری جوتیاران هەڵوەشاندووەتەوە.
ئێمە پێمانوایە دیاردەی خۆهەڵقورتاندنی هێزەكانی سوپا لە كێشەی زەویوزار لە ناوچەیەكی هەستیاری وەكو ناوچە دابڕاوەكانی كەركوك هیچ ژینگەیەكی تەندروست بۆ بەرقەراركردنی یاساو دەستوور دابین ناكات، بەڵكو ئاڵۆزتریشی دەكات، ئەركی سەرۆكوەزیرانی حكومەتی ئیئتلافیشە روونتر ئەم بەرپرسیارێتییە نیشتمانیی و دەستورییە بگرێتە ئەستۆو بە هیممەتتر لەسەری بێتە جواب.
مەكتەبی سیاسیی
یەكێتیی نیشتمانیی كوردستان
