شەرع و ئەردۆغان بەیەك چاو تەماشای كورد دەكەن، لای ئەوان ئەو كوردە باشە كە ملكەچ و جاشە
ئەنەكەسە لەئیئتیلاف كشایەوەو لیژنەی گفتوگۆی شەرعی رەتكردەوە، هەردوو بڕیاریان باش بوو
پێویستە كورد ئەجێندایەكی هاوبەش ئامادەبكات، تێگەیشتنی خۆی بۆ مافی كوردو ئایندەی سوریا بخاتەڕوو
سەرتیپ جەوهەر
لەدوای رووخانی رژێمی ئەسەد هەوڵی زۆر هەبووە بۆ یەكخستنی ناو ماڵی كورد لەسوریا. كۆبونەوەكانی هەولێرو قامیشلۆ پێشكەوتنی باشیان بەخۆیەوە بینیوە، بەڵام هێشتا كاتی پێویستە بۆ بەرەوپێشچوونی زیاتری ئەو یەكخستنە.
كشانەوەی ئەنجومەنی نیشتیمانیی كورد لەسوریا لە چوارچێوەی ئیئتیلافی موعارەزەی سوریا هەنگاوێكی ئەرێنی بوو بەرەو زیاتر لەیەكتر نزیكبوونەوە لەپەیەدەو دەسەڵاتدارانی رۆژئاوای كوردستان، هەروەك دەركردنی بەیان و دەربڕینی ناڕەزایی لەسەر بەشداریپێنەكردنی كورد لەلیژنەی ئامادەكاریی بۆ گفتوگۆی نیشتیمانیی لەسوریا لەلایەن ئەنەكەسەوە دیسان هاوهەڵوێستی بوو لەگەڵ رێڤەبەری خۆسەرو هەسەدە لەسوریا. ئەم دوو هەڵویستە جێی پەسنكردنە.
ئیئتیلافی سوریا، هاوپەیمانێتیەكی موعارەزەی سوریایە، بریتیە لەچەندین حزب و لایەن و كەسایەتی عەرەبیی، زۆربەیان تێگەیشتنی شۆڤینیی و دەمارگیریی عەرەبیان بەرامبەر مافی كوردو چارەسەری پرسی كورد لەسوریا هەیە. لەلایەن توركیاو چەند وڵاتێكی كەنداو پشتیوانیی دەكرێن.
هەنگاوەكانی ئەحمەد شەرع-یش لەسوریا بەتێگەیشتنێكی عروبی ئیسلامیی و لەژێر كاریگەری ئەجێندای توركیایە، بۆیە بۆ ئەحمەد شەرع و ئەردۆغان، بەیەكچاو تەماشای كوردو ئایندەی رۆژئاوای كوردستان دەكەن. لای ئەوان ئەو كوردە باشە كە ملكەچ و جاشە. بۆیە بۆ كورد باشترین قەلغان لەم دۆخە، یەكدەنگیی و یەك هەڵوێستییە، نەك پەرتەوازەیی و دوو بەرەیی. پێویستە هەموو لایەنەكانی كورد لەهەر پارچەیەكی كوردستان هاوكاری هەردوولا بكەن بۆ زیاتر لەیەكتر نزیكبوونەوە.
ئەوەی زۆر گرنگە لەونێوانەدا، كورد بەیەك وەفد بچێتە دیمەشق “ئەگەر گفتوگۆكرا” هاوكات هیچ حزب و لایەن و تەنانەت كەسایەتیەكیش بەبێ بڕیارێكی دەستەجەمعیی و سازانیی نێوان لایەنەكانی كورد لەرۆژئاوای كوردستان بەشداریی لە هیچ كۆنگرەو كۆبونەوەیەكدا نەكات كە پەیوەندی بەمافی كوردو ئایندەی رۆژئاوای كوردستانەوە هەبێت. هەروەك پێویستە پێشوەختە لایەنە سیاسیەكانی كورد پرۆژەیەكی چارەسەری روون ئامادەبكات و تێگەیشتنی خۆیان لەبارەی مافەكانی گەلی كوردو ئایندەی سوریاو رۆژئاوای كوردستان بخاتە روو.
