پارێزگاری سلێمانی لە ساڵڕۆژی ڕووداوەكانی 17ی شوباتی ساڵی 2011دا و لە سەر گۆڕی شەهیدانی ئەو یادە دەڵێت: ئەم دەسەڵاتە نە گوێیەکی هەیە بۆ بیستن، نە چاوێکی هەیە بۆ بینین.
د. هەڤاڵ ئەبوبەكر، پارێزگاری سلێمانی لە وتەیەكدا بۆ میدیاكان، پەیامنێری (خەڵك) ئامادەی بوو ڕایگەیاند، ئەم یادانە تەنها یادێك نیین بۆ درێژەپێدان و بۆ خۆبەتاڵكردنەوە بۆ ئەو دەسەڵاتەی گوێیەكی نییە بۆ بیستن و چاوێكی نییە بۆ بینین و دڵ و هەستێكی نییە بۆ هەستكردن و بڕیاردانێكی شایستانە و ڕاوێژ و گفتوگۆكردن لەگەڵ میللەتەكەی خۆیدا ئێمە بێین كۆمەڵێك ڕستە بڵێین و هەریەكەی بڕواتەوە بۆ شوێنی خۆی.
ڕاشیگەیاند، دەبێت ئێمە بەدوای بەدیلدا بگەڕێین و بەڕاستەقینەیی بێینە ناو ئەم پڕۆسەیەوە و پێویستمان بەوەیە كۆتایی بە تەخوین كردنی یەكتری بهێنین.
وتیشی، “ئەوەی من گوێم لێی دەبێت بەردەوام ئەوانەی ئۆپۆزسیۆن زیاتر دەكەونە بەر تیری ئەوانەی لە دەسەڵاتدان، بەبێ ئەوەی بژاردەی سێیەممان هەبێت”.
ئاماژەی بەوەشكرد، دەسەڵاتێكمان هەیە ئەمەیە، كە ئێستا خەڵك دەیبینێت و ئۆپۆزسیۆنێكیشمان هەیە و خەڵكێكی ناڕازیشمان هەیە و لەم هاوكێشەیەدا دەبێت ئەم سێ كوچكەیە بگەینین بە یەكتری، چونكە تەنها بەزیادكردنی بەرەی نەیارەكانمان سەركەوتوو نابێت.
