سەرۆکی هەرێمی کوردستان ڕایگەیاند، پێویستە ھەمووان کار بۆ سەرخستنی پرۆسەی ئاشتی بکەن، چونکە ئاشتی بۆ ھەمووان لە تورکیا و ناوچەکە پێویستە.
ئەمڕۆ دووشەممە، نێچیرڤان بارزانی، سەرۆکی هەرێمی کوردستان لە میانی کۆبوونەوەی لەگەڵ شاندی پارتی یەکسانی و دیموکراسی گەلان (دەم پارتی) کە بە “شاندی ئیمرالی” ناسراوە، پرۆسەی ئاشتی لە تورکیا بە دەرفەتێکی گرنگ و مێژوویی لە قەڵەم دا و ڕایگەیاند: “پێویستە ھەمووان کار بۆ سەرخستنی پرۆسەکە بکەن، چونکە ئاشتی بۆ ھەمووان لە تورکیا و ناوچەکە پێویستە”.
نێچیرڤان بارزانی ھەموو ھاوکاری و پشتگیرییەکی بۆ سەرکەوتنی پرۆسەی ئاشتی لە تورکیا دووپات کردەوە، ھەروەھا پرۆسەکەی بە دەرفەتێکی گرنگ و مێژوویی لە قەڵەم داوە و ڕایگەیاند، “پێویستە ھەمووان کار بۆ سەرخستنی پرۆسەکە و برایەتیی کورد و تورک بکەن، چونکە ئاشتی بۆ ھەمووان لە تورکیا و ناوچەکە پێویستە”.
وتیشی: ئێمە ھەر لە سەرەتاوە ھەمیشە کارمان کردووە بۆ ئەوەی پرۆسەی ئاشتی بێتە ئاراوە و کێشەکان ئاشتیانە چارەسەر بکرێن، چونکە ئەزموون سەلماندوویەتی شەڕ و چەک ھیچ کێشەیەک چارەسەر ناکەن”.
نێچیرڤان بارزانی ھیوای خواستووە کە پەکەکە ستراتیژییانە لە پرۆسەکە بڕوانێت و پێویستە ئەم دەرفەتە لەدەست نەدرێت.
لەبەرامبەردا، شاندی دەم پارتی “شاندی ئیمرالی” کە لە کۆبوونەوەکەدا، تێشکیان خستووەتە سەر ھەنگاوەکانی پرۆسەکە، ھەروەھا ستایش و پێزانینی خۆیان بۆ ھەوڵەکانی نێچیرڤان بارزانی لە پرۆسەی پێشتر و ئێستای ئاشتیدا دەربڕیوە و داوایان کردووە کە نێچیرڤان بارزانی لەسەر ھاوکاری و پشتگیریی خۆی بۆ سەرخستنی پرۆسەکە بەردەوام بێت.
