بۆ یەکەمجار لە دوای ڕووخانی ڕژێمی بەشار ئەسەد، لە ٨ی کانوونی دووەم، ئەسما ئەسەد، هاوسەری سەرۆک کۆماری پێشووی سووریا، لە زنجیرە تویتێکدا لە تۆڕی کۆمەڵایەتی “X” دەرکەوتەوە.
ئەکاونتە نوێیەکەی ئەسما ئەسەد لەلایەن حافز ئەسەدی کوڕی لە هەژماری تایبەتی خۆی لە تێلێگرام ئاشکرا کرا، کە پێشتر ڤیدیۆیەکی خۆی لە یەکێک لەشەقامەکانی مۆسکۆ بڵاوکردبووە وە.
حافز بەشار ئەسەد، نووسیویەتی: “ئەمە ئەکاونتی خاتوو ئەسما ئەسەدە لە پلاتفۆرمی ئێکس، ئەکاونتەکە دوور دەبێت لە باسو خواستی سیاسەت، ئامانجی ئەوەیە ناوەڕۆکێک پێشکەش بکات کە ڕەنگدانەوەی لایەنە جیاوازەکانی ژیان و چالاکییە مرۆییەکانیەتی” .
ئەسما ئەسەد ئاماژەی بەوەکردووە: “هەموو ڕووداوێک چیرۆکی خۆی هەیە، هەر قۆناغێکیش نهێنی خۆی هەیە، ئامانج لەم سەکۆیە وروژاندن و مشتومڕ نییە، بەڵکو گێڕانەوەی چیرۆکەکانە وەک خۆی، دوور لە گرژی و تۆمەت، کاتی ئەوە هاتووە وەک خۆی ڕووداوەکان بگێڕینەوە”.
ئەسما ئەسەد نووسیویەتی؛ لە ماوەی ساڵانی ڕابردوودا هەمیشە لە پرسە سیاسییەکاندا بێدەنگ بووم، لە داهاتووشدا دەستوەردان ناکەم.
ئاماژەی بەوەشکرووەد، “دوای ماوەیەک لە بێدەنگی، کاتی ئەوە هاتووە کە جارێکی دیکە دەست پێبکەین، هیوا و گۆڕانکاری هەرگیز ناوەستن، بۆیە با پێکەوە دەست پێبکەین”، جەختیشی لەوە کردووەتەوە کە “سووریا بە هەموو جوانی و مێژووە دێرینەکەیەوە لە دڵماندا دەمێنێتەوە، هیوای سەلامەتی و خۆشگوزەرانی بۆ گەلەکەم دەخوازم، و ڕۆژانی پڕ لەخۆشی بگەرێتەوە بۆ هەموو گۆشەیەکی خاکەکەی”.
ئەسما ئەسەد جەختی لەوە کردەوە کە “نیشتمان تەنها شوێنێک نییە، بەڵکو هەستێکە کە لە دڵدا نیشتەجێیە هەرچەندە دوور بین سووریا، بەڵام وەک جوانترین چیرۆک دەمێنێتەوە”.
لە درێژەی دەربڕینەکانیدا لە تۆڕی کۆمەڵایەتی ئێکس ئەسما ئەسەد دەڵێت: “هەرکەس ڕێگای خۆی هەیە، هەندێک ڕێگاش هەرگیز هەڵبژاردەی من نەبوون، لێرەدا بیرکردنەوەکانم بەیەکەوە دەبەستمەوە، دوور لە هەر ناونیشانێکی تر، قۆناغ گەلێکیش لە ژیاندا هەن کە ناسڕدرێنەوە، ئایا کاتی ئەوە هاتووە کە هاوبەشی بکەم لەگەڵتان؟”
