عێڕاق بڕیاریدا لەبری سووتەمەنی ڕەش کە ئێستا لەکارگەکان کاریپێدەکرێت، غازی شلی LPG دابینبکرێت و بکرێتە جیگرەوەی.
لەکۆبوونەوەی ئەمرۆی ئەنجوومەنی وەزیرانی عێراق، بڕیاردرا بە ڕاسپاردنی وەزارەتی نەوتی عێراق بۆ دابینکردنی غازی شل(LPG) بۆ کارگەکان.
بەپێی بریارەکە، دەبێت وەزارەتی نەوتی عێراق غازی شل LPG بۆ کارگەکانی خشت دابینبکات، کە لە هەموو ناوچەکانی عێراق کاردەکەن لەبری ئەو سووتەمەنییەی ئێستا بەکاردەهێنرێت.
هەربەپێی بڕیارەکە، ئاسانکاریدەکرێت بۆ خاوەن کارگەکان کە سیستمی نەوت بۆ غازی شل بگۆرن، ئەمەش لەپێناو پاراستنی ژینگە و دوورکەوتنەوە لە سووتەمەنی ڕەش کە ئێستا کاریپێدەکرێت و ژینگە زیاتر پیس دەکات.
هاوکات هەرلەکۆبوونەوەکەدا، ئەنجوومەنی وەزیران بڕیاریدا بەلێخۆشبوونی ئەو کەرەستە خاوانەی کە لەلایەن خاوەن کارگە نیشتمانییەکانەوە هاوردە دەکرێن.
هاوکات ئەنجوومەنی وەزیران بڕیاریدا، بۆلەمەودوا لەهەر پرۆژەیەکی نیشتەجێبوون لە خانوو و شوقە و هەرپرۆژەیەکی تر، لایەنی جێبەجێکار و خاوەندار ناچاربکرێت بەدانانی سیستەمی بەرهەمهێنانی وزەی خۆر بە ڕێژەی 50% بەلایەنی کەمەوە، لەگەڵ بەکارهێنانی کەرەستەی عەزلی لە دروستکردنی یەکەکانی نیشتەجێبوون و شوقەدا.
