شاندی ئیمرالی پەیامی ئۆجالان و هەوڵەکانی پرۆسەی ئاشتییان بە سەرۆکی پارتی گەیاند و ئەویش ئامادەیی خۆی بۆ پشتیوانی پرۆسەکە ڕاگەیاند.
ئەمڕۆ یەکشەممە، لە سەڵاحەدین مەسعود بارزانی، سەرۆکی پارتی دیموکراتی کوردستان پێشوازی لە شاندی ئیمرالی بە سەرۆكایەتیی پەروین بولدان و سری سورەیا ئوندەر كرد.
لە دیدارەكەدا شاندی میوان بیروبۆچوونی خۆیان لەمەڕ بارودۆخی سیاسی و پڕۆسەی ئاشتی لە توركیا و وردەكاری و ئەنجامی دیدارەكانیان لەگەڵ عەبدوڵا ئۆجالان بۆ بارزانی خستەڕوو و ناوەڕۆكی پەیامی عەبدوڵا ئۆجەلانـیشیان بە مەسعود بارزانی گەیاند.
هەر لەو دیدارەدا سەرۆكی پارتی وێڕای بەخێرهێنانی شاندی میوان، جەختی لە بایەخی پڕۆسەی ئاشتی وەك تاكە ڕێگەی دروست بۆ گەیشتن بە چارەسەری كردەوە و بە پێویستیشی زانی كە هەموو لایەك هەوڵی خۆیان لەوەدا چڕ بكەنەوە كە پڕۆسەی ئاشتی بگاتە ئەنجام.
بارزانی ئامادەیی تەواوی خۆشی بۆ یارمەتیدان و پشتیوانیی پڕۆسەی ئاشتی لە توركیا و سەرگرتنی ڕاگەیاند.
