ئەحمەد شەرع، سەرۆکی قۆناغی ڕاگوزەری سووریا لە میانی کۆبوونەوەکەی لەگەڵ کەسایەتییەکانی عەفرین بەڵێنی داوە و کۆتایی بە ستەمی گرووپە چەکدارەکان بهێنێت و خەڵکی عەفرین بگەڕێنەوە سەر ماڵ و حاڵیان.
ئەحمەد حەسەن، سەرۆکی ئەنجوومەنی ئەنەکەسە لە عەفرین، کە یەکێک بوو لە بەشداربوونی کۆبوونەوەکەی دوێنێ کەسایەتییەکانی عەفرین لەگەڵ ئەحمەد شەرع بە کەناڵی ڕووداوی ڕاگەیاند، کۆبوونەوەکە کە زۆربەی لە کوردانی عەفرین بوون، نزیکەی دوو کاتژمێری خایاند.
وتیشی: “نامەیەکمان بە ناوی ئەنەکەسە لە عەفرین بۆ ئەحمەد شەرع، سەرۆکی سووریا خوێندەوە تێیدا باسی ئەو پێشێلکارییانەمان کرد کە لە عەفرین دەکرێن”.
ئەوەشی خستەڕوو کە لە کۆبوونەوەکە دا باسی باجیان کردووە، کە رۆژانە گرووپە چەکدارەکان لە خەڵکی عەفرین وەریدەگرن و بە هەزاران دۆلار لە خەڵک بە زۆر وەردەگیرێت. هەروەها باسی ئەو خانوو و ماڵانەی خەڵکی رەسەنی عەفرینیان کردووە، کە سەرەڕای ئەوەی بەتاڵن، بەڵام هێشتا کلیلەکانیان لە دەستی گرووپە چەکدارەکاندایە و نایدەنەوە خاوەنە رەسەنەکانیان.
سەبارەت بە وەڵامی ئەحمەد شەرع و بەڵێنەکانی بۆ خەڵکی عەفرین، ئەحمەد حەسەن دەڵێت “شەرع لە قسەکانیدا گوتی، یەکەم شاری سەر بە پارێزگای حەلەب کە سەردانی کردووە عەفرینە، ئەویش لەبەر ئەوەی کاتێک لە ئیدلب بوو دراوسێی عەفرین بوو و هەموو پێشێلکارییەکانی دەبینی، بەڵام ئەو کاتە هیچیان لە دەست نەدەهات. شەرع بەڵێنی دا ئەم پێشێلکارییانە نەمێنن.”
ئەحمەد شەرع، بەڵێنیشیدا لە چەند رۆژی داهاتوودا نووسینگەیەک بۆ تۆمارکردنی سکاڵا لەلایەن خەڵکی عەفرینەوە دەکەنەوە و هێزەکانی ئاسایشی ناوخۆ دەهێننە نێو عەفرین. “شەرع بە خەڵکی عەفرین کە لە کۆبوونەوەکەدا ئامادە بوون، گوتی گرووپە چەکدارەکان لە عەفرین دەردەکەن و ناوێکی دیکەیان لێ دەنرێت”.
سەبارەت بە گەڕانەوەی خەڵکی رەسەنی عەفرین بۆ ناوچەکەی خۆیان، ئەحمەد حەسەن رایگەیاند، لە کۆبوونەوەکەدا ئەحمەد شەرع جەختی کردەوە لەوەی عەفرینییەکان بگەڕێنەوە سەر جێگە و رێی خۆیان و گوتیشی ئەوان و هەسەدە پێکەوە دیالۆگیان کردووە،بە فەرماندەی هەسەدە مەزڵووم عەبدیی گوتووە، لە هەر ئەگەرێکدا، ئەوان رێکبکەون یان نا، دەبێت خەڵکی عەفرین کە لە ناوچەکانی هەسەدەن، بگەڕێنەوە سەر جێ و رێی خۆیان.
