سەرۆکی پارتی گەشەپێدانی تورکمان ڕایدەگەیەنێت، ئەو چالاكی و خۆپیشاندانانەی لەژێر ناوی مووچە دەكرێن، سیاسیین و جەماوەری نیین گەر بۆ مووچە بوونایە دەبوو ڕوو لە دەسەڵاتدارانی مووچەبڕی بەغدا بكەن.
محەمەد سەعدەدین، سەرۆکی پارتی گەشەپێدانی تورکمان و پەرلەمانتاری خوولی پێشوو ڕایگەیاند، ئەوەی پێشتر هەبووە لە نەناردنی مووچە ڕوونە، كە سیاسی بووە و حكومەتی عێراق پەڵپ و بیانووی گرتووە، بەڵام ئێستا ئەو قۆناغە تەواو بووە، لەبەر ئەوە ئەوانەی ئێستا باسی مووچە دەكەن، كە خۆپیشاندان و چالاكییان هەیە، ئەوەی تێبینی دەكرێ چالاكی سیاسییە نەك جەماوەری.
دەشڵێت: ئەوانە نوێنەرایەتی دەنگی خەڵك ناكەن، بەڵكو گوزارشت لە لایەنێكی سیاسی یان بیرۆكەی نوێنەری لایەنێكی سیاسی یان گرووپێكی بچووك دەكەن، ئەگەر بۆ مووچە بوایە دەبوو ڕوویان لە بەغدای مووچەبڕ بكردایە.
ئاماژەی بەوەشكردووە، ئەو داوایانەی لەو خۆپیشاندانانە! دەیخەنەڕوو، حكومەتی هەرێمی كوردستان خۆی ئەو قسانە دەكات، چەندان جار سەرۆكی حكومەت خۆی لە میدیا و كۆڕ و كۆبوونەوەكان جەختی لەوە كردووەتەوە، كە كێشەكەی مووچە لای حكومەتی عێراقە، وەكو بینیمان هەر واش دەرچوو، لەبەرئەوە ئێستا خەڵكی كوردستان و زۆرینەی لایەنە سیاسییەكان و پێكهاتەكان پشتیوانی لە حكومەتی هەرێمی كوردستان دەكەن و دەستخۆشی لێ دەكەن.
