شارەزایەكی كەشناسی ڕایدەگەیەنێت، سبەینێ شەو بەهۆی كاریگەری دەریای سوورەوە شەپۆلێكی لاوازی باران بارین بەشێكی هەرێم دەگرێتەوە و لە ناوچە شاخاوییەكان بەفر دەبارێت.
پشتیوان ئیبراهیم، شارەزای كەشناسی بۆ (خەڵك) ڕایگەیاند، سبەینێ یەك شەممە ئاسمان هەور و خۆرە، بەڵام بە هۆی کاریگەری دەریای سوور لە درەنگانی شەو تاوەکو بەرەیانی ڕۆژی دوو شەممە 17/2/2025 باران بارین بە لاوازی سنورەکانی ئیدارەی گەرمیان، پاڕێزگای هەڵەبجە، پاڕێزگای سلێمانی، دەشتی شارەزوور، پاڕێزگای کەرکوک هەیە و ڕێژەکە بەپێی ناوچەکان جیاوازە، بەڵام بارانەکە لاوازە و ئەگەری چەند ملیمێک هەیە .
ڕاشیگەیاند، لە شاخە بەرزەکان کە لە 1500مەتر بەرزترە ئەگەری بەفر هەیە .
ئاماژەی بەوەشكرد، پلەکانی گەرما لە 2 پلە بۆ 5 پلە بەرزدەبێتەوە بەپێی ناوچەکان هەروەها خێرایی با لە 15 کم بۆ 20 کم دەبێت لە کاتژمێرێکدا بەپێی کات و شوێن گۆڕانکاری ڕوودەدات .
