پێنج بڕیار دەربارەی ماتۆڕکانی گەیاندنی خواردن دەردەکرێت و هاتووچۆی هەولێر ڕایگەیاند، دەبێت لە کاتی گەیاندنی خواردن بۆ ناو شارەکان ماتۆڕی کارەبایی و بێدەنگ بەکاربهێندرێت.
ئەمشەو بەڕێوەبەرایەتی هاتووچۆی هەولێر ڕایگەیاند، ئاماژە بەکۆبونەوەی ڕۆژی دووشەممەی ڕێکەوتی ١٠ شوباتی ٢٠٢٥، بەڕێوەبەری گشتی دیوانی وەزارەتی ناوخۆ و بەرێوەبەری هاتووچۆی هەولێر لەگەڵ پارێزەری کۆمپانیاکانی گەیاندنی خواردن -دیلڤەری کۆبوونەوە بۆ تاوتوێکردنی یاسا و ڕێساکانی هاتووچۆ و سەلامەتی لەلایەن ماتۆڕسوارانی گەیاندنی خواردن لەشارەکانی هەرێمی کوردستان.
ڕوونیشیکردەوە کە دوای تاوتوێکردنی خاڵەکان لەگەڵ جەنابی وەزیری ناوخۆ، کۆمپانیاکانی گەیاندنی خواردن ئاگادار دەکرێنەوە بەجێبەجی کردنی ئەم خاڵانەی خوارەوە:
یەکەم: پابەند کردنی ماتۆرسوارانی گەیاندنی خواردن بە تۆمار کردنی ماتۆرەکانیان لە بەڕێوەبەرایەتیەکانی هاتووچۆ و گشت ماتۆڕسواران دەبێت مۆڵەتی لێخوڕینی ماتۆڕیان هەبێت. لەماوەی شەش مانگ دوای دەرچوونی ئەم نووسراوە. هەر ماتۆرێک مەرجەکانی تۆمارکردن و سەلامەتی تێدانەبێت نابێت دەرفەتی کارکردنی پێبدرێت لەلایەن کۆمانیاکانی گەیاندنی خواردن، بە پێچەوانەوە کۆمپانیاکە سزا دەدرێت.
دووەم: ئەو ماتۆڕسوارانەی گەیاندنی خواردن کە لە ڕابردوودا بێ تابلۆ و تۆمارکردن لەلاتان کاریان کردووە سەرپێچی یاساکانی هاتووچۆیان کردووە و سزایی دارایان هاتووەتە سەر. بە ناسینەوەی لۆگۆی تایبەت بە کۆمپانیاکانتان ئەوا بەرپرسیاریەتی کەمتەرخەمی دەکەوێتە ئەستۆی کۆمپانیاکانتان. ڕەزامەندین لەماوەیەک کە درێژتر نەبێت لە ٢٠٢٥/١٢/٣١ پێبژاردنەکە بەشێوازی پشک (قسط) بدرێت. لەگەڵ سوودوەرگرتن لە ڕێژەی داشکاندن بەپێی ڕێنمایی سزادارایەکان لەبەڕێوە بەرایەتی هاتووچۆی تایبەتمەند یەکلابکەنەوە تا ٢٠٢٥/١٢/٣١ لەدوای ئەم ڕێکەوتە بە پێچەوانەوە کۆمپانیاکان ڕووبەڕووی لێپرسینەوەی یاسایی و ڕاگرتنی کارەکانی دەکرێت.
سێیەم: کۆمپانیاکان پێویستە پابەند بن بە ڕەخساندنی دەرفەتی کارکردن بۆ هاوڵاتیانی هەرێمی کوردستان بەگوێرەی بڕیاری (١٧٢) ئەنجومەنی وەزیران و هەر بیانیەک لە کۆمپانیاکانتان کار بکات پێویستە نیشینگەی هەرێمی هەبێت و بەسەرنەچووبێت و مۆڵەتی لێخورینی ماتۆڕی هەبێت. هەرەوەها ئەوانەی خواردن دەگوازنەوە بۆ ماڵان لەلایەنی ئەمنی و پاشخانی تاوان بەڵگەنامەی بێ تاوانی پێشکەشتان بکەن و لەناو دۆسیەکانیان پارێزراو بێت. بەپێچەوانەوە کۆمپانیەکە بەرپرسیارەیەتی یاسایی هەڵدەگرێت.
چوارەم: بۆ ڕەچاو کردنی میزاجی گشتی هاووڵاتییان پارێزگاریکردن لە پیسنەبوونی ژینگە پێویستە بۆ گەیاندنی خواردن بۆ گەڕەکەکانی ناوشار لەڕێگەی ماتۆڕی کارەبایی و بێدەنگەوە بێت. و بەگشتی سەرجەم ماتۆڕەکان دەبێت لەڕووی دەنگەوە بێزارکەر نەبن.
پێنجەم: بۆ سەلامەتی گیانی ماتۆرسوارەکان پێویستە ماتۆرسوارەکان پابەند بن بە لەسەرکردنی کڵاوی سەر و جلوبەرگی تایبەت. لەبەر بارودۆخی ئەمنی پێویستە هەر کۆمپانیایەک جلوبەرگی تایبەت بەخۆی هەبێت لۆگۆی تایبەت بە کۆمپانیاکەی لەسەر بێت. پێویستە ماتۆرسوارەکان پابەندی یاسا و ڕینمایەکانی هاتووچۆ تایبەت بە لێخورینی سەلامەت بن و ژیانی خۆیان و بەکارهێنەرانی شەقام نەخەنە مەترسی.
