وەزارەتی دارایی هەرێم ڕایدەگەیەنێت، كە لە داهاتی نانەوتی بەشی گەنجینەی فیدڕاڵی بە بڕی زیاتر لە 51 ملیار دینار خرایە سەر هەژماری وەزارەتی دارایی فیدڕاڵ.
وەزارەتی دارایی هەرێم لە ڕاگەیەنراوێكدا ئاماژەی بەوەكردووە، بەشی گەنجینەی فیدراڵی لە داهاتی نانەوتی هەرێمی کوردستان بۆ مانگی کانونی دووەمی ساڵی ( ٢٠٢٥ ) کە بڕەکەی ( ٥١،٨٩٥،٤٥٧،٨٧٧ ) دینارە، بەشێوەی کاش خرایە سەر هەژماری بانکی وەزارەتی دارایی حکومەتی فیدراڵ لەلقی هەولێری بانکی ناوەندی عێراق.
ئەمە لەكاتێكدایە، كە بەپێی ڕێككەوتنی هەولێر و بەغدا دەبێت مانگانە هەرێمی كوردستان نیوەی داهاتی نانەوتی ڕادەستی گەنجینەی فیدڕاڵی بكات.
دوێنێ لە نووسراوێكدا، تەیف سامی، وەزیری دارایی عێراق داوای لە هەرێمی كوردستان كردووە پشكی داهاتی نانەوتی ڕادەست بكەن لەگەڵ لیستی مووچە و زانیاری فەرمانبەران بۆ تەوتین كردنی مووچەكانیان.
