لە سەردانێکیدا بۆ نەخۆشخانەی شار لە سلێمانی، شاندی باڵیۆزخانەی فەڕەنسا لە عێراق ڕایگەیاند، نەخۆشخانەی شار یەکێکە لە باشترین نەخۆشخانەکان.
بەڕێوەبەرایەتی گشتی تەندروستی سلێمانی بڵاویکردەوە: شاندێکی دیپلۆماتی باڵیۆزخانەی فەرەنسا لە عێراق لەچوارچێوەی سەردانیان بۆ ژمارەیەک لە نەخۆشخانەکانی پارێزگاکانی عێراق و هەرێمی کوردستان، ئەمڕۆ سەردانی نەخۆشخانەی شاریان کرد لەسلێمانی و بەشە جاجیاکانی نەخۆشخانەکەیان بەسەرکردەوە و لەنزیکەوە ئاشنابوون بەو خزمەتگوزارییانەی پێشکەش دەکرێن.
دەشڵێت: شاندەکەی باڵیۆزخانەی فەرەنسا سەرسامیان بە ئاستی بەرزی خزمەتگوزارییەکانی نەخۆشخانەی شار نیشاندا و ڕایانگەیاند، نەخۆشخانەی شار یەکێکە لە باشترین نەخۆشخانەکان لەسەر ئاستی عێراق و ئەوەی لەم نەخۆشخانەیە بینیویانە له هیچ نەخۆشخانەیەکی تری عێراق نەیانبینیوە.
باسی لەوەشکردووە: شاندەکەی باڵیۆزخانەی فەرەنسا لە عێراق خزمەتگوزارییەکانی نەخۆشخانەی شاریان بەزرنرخاند لەڕووی پێشوازی نەخۆش و حاڵەتی فریاکەوتن و پێشکەش کردنی خزمەتگوزارییەکانی تر، ئەوەیان خستەڕوو جێی خۆشحاڵییە کە نەخۆشخانەی شار سەرباری ئەوەی نەخۆشخانەیەکی فریاکەوتنە، بەڵام خوێندنی دکتۆرای سێ بۆردی کوردستانی و عێراقی و عەرەبی تێدادەخوێنرێت.
