لە سبەینێوە هەناردەکردنی مریشک و بەرهەمەکانی پەلەوەرخانەکانی هەرێم بۆ کەرکوک و شارەکانی عێراق دەستپێدەکاتەوە و بەوەش نرخەكەی لەو ناوچانە هەرزان دەبێت.
لە ماوەی مانگی ڕابردوودا بەهۆی ڕاگرتنی هەناردەی مریشك و هێلكە لە هەرێمەوە بۆ كەركوك و ناوچە كوردستانییەكان و شارەكانی دیكەی عێراق، نرخی مریشك و هێلكە بەڕێژەیەكی بەرچاو ڕووی لە بەرزبوونەوە كردبوو، بەجۆرێك لە كەركوك نرخی یەك كیلۆ گۆشتی مریشك گەیشتبووە نزیكەی 5 هەزار دینار.
بڕیاری ڕاگرتنی هەناردەکردنی مریشک و بەرهەمەكانی پەلەوەر دوای ئەوە دێت، کە عێراق بەبیانووی بڵاوبوونەوەی نەخۆشی لەنێو پەلەوەرخانەکانی هەرێم، هاوردەکردنی مریشکی لە هەرێمی کوردستان قەدەغە کردبوو.
ڕۆژی 4ی ئەم مانگە شاندێكی کشتوکاڵی عێراق سەردانی هەولێریان کرد و لە پەلەوەرخانەکان سامپڵیان لە مریشکەکان وەرگرت بۆ دڵنیابوونەوە لەتەندروستییان، ئەمڕۆش پشکنینەکانمان لەبەغدا گەڕانەوە و بێ کێشەبوون، هەربۆیە بڕیاردرا سبەی هەناردەکردنی مریشک و بەرهەمی پەلەوەرخانەکانی هەرێم بۆ کەرکوک و شارەکانی عێراق دەستپێبکاتەوە.
بەپێی بەدواداچوونی (خەڵك) لە دوكانەكانی فرۆشتنی مریشك لە (كەركوك) كاسبكاران دەڵێن: دووبارە هەناردەکردنەوەی مریشک بۆ کەرکوک و ناوچەکانی عێراق، وادەکات نرخی مریشک بەشێوەیەکی بەرچاو هەرزان ببێت.
د. ئەحمەد كەركوكی، ئەندامی ئەنجوومەنی پارێزگای كەركوك لە فراكسیۆنی یەكێتی ڕایگەیاند، لە سبەینێوە هاوردەکردنی مریشک بۆ کەرکوک دەستپێدەکاتەوە و نرخەکەی هەرزان دەبێت.
ئەمە لەكاتێكدایە، كە بەهۆی ڕاگرتنی هەناردەی مریشك بۆ شارەكانی عێراق، بەرهەمی مریشك لە بازاڕەكانی هەرێم بەڕێژەیەكی بەرچاو زیادی كردبوو، ئەمەش بووبووە هۆی هەرزان كردنی نرخەكەی، بەجۆرێك نرخی یەك كیلۆ مریشكی ناسك دابەزیبوو بۆ 2 هەزار دینار و مریشكی پیر “ئومەهات” بۆ 2500 دینار.
