شاندێکی وەزارەتی دارایی هەرێمی کوردستان بە لیستی مووچەی مانگی دووەوە دەچێتە بەغداد و کێشەی خانەنشینی هەرێمیش بەردەوامە.
ئەمڕۆ شاندێکی هونەریی وەزارەتی دارایی هەرێم گەیشتە بەغداد و بە پێی میدیای بزووتنەوەی گۆڕان ئامانجی سەردانەکە تەواوکردنی ئەو وردەکارییانەیە کە پێویستی بە رێککەوتنی نێوان هەردوولا هەیە بۆ ناردنی مووچەی مانگەکانی ساڵی 2025، لەگەڵ ئەو وردەکارییانەی دیکە بۆ رێکخستنەوەی میلاکات و هاوتاکردن و بایۆمەتری و بەبانکیکردنی موچەی فەرمانبەران.
بڕیارە هەفتەی داهاتووش شاندێکی باڵای هەرێم بە لیستی مووچەوە سەردانی بەغداد بکاتەوە.
لەلایەکی دیکەشەوە هادی ئەکرەم، بەڕێوەبەرى جێبەجێکار لە بەڕێوەبەرایەتى خانەنشینی پێشمەرگەى سلێمانى ڕایگەیاند، شاندێکی لە وەزارەتی دارایی هەرێمى کوردستان، بە هاوبەشی لەگەڵ نوێنەری وەزارەتی پێشمەرگە سەردانی بەغداد دەکات و گفتوگۆ لەسەر هاوتاکردنی مووچەی خانەنشینانی سەربازیی دەکەن.
وتیشی، “دۆسیەکانى تەرازووی پێداچوونەوە، رێکارەکانی رادەستکردنی داهاتی 50%ـی نانەوتی و چەند پرسێکی دیکەی تایبەت بە مووچەش، لەگەڵ بەغداد باس دەکەن”.
هەر ئەمڕۆ سۆران عومەر، ئەندامی لیژنەی ئابووری ئەنجومەنی نوێنەران ڕایگەیاند، “مووچەی خانەنشینان لە مانگی دوودا گۆڕانکاری بەسەردا دێت، وەزارەتی دارایی عێراق دەڵێت هاوتاکردنی مووچەی خانەنشینی لەدوای دەرچوونی بڕیاری دادگای فیدراڵیەوە جێبەجێ دەکرێت واتە لە 2022/11/23 بە دوا”.
ڕوونیشیکردەوە کە “ئەوەی پێشتر هەرێمی کوردستان مووچەکەی هاوتا کردبوو هەڵدەوەشێتەوە و دەیانەوێ پارەکەشیان لێ وەربگرنەوە”.
سۆران عومەر ڕاشیگەیاند، “ئەمە ناحەقیە بەرامبەر بەخانەنشیننان و لەهەوڵداین یاسای خانەنشینی یەکگرتووی عێراق بەسەر هەموو خانەنشیناندا جێبەجێ بکرێت نەک تەنها ئەوانەی لە دوای دەرچوونی بڕیاری دادگای فیدراڵییەوە خانەنشین بوون”.
