کۆمسیۆنی باڵای سەربەخۆی هەڵبژاردنەکان ڕایگەیاند، دابەشکردنی پاداشتی دارایی بەسەر کارمەندانی دەنگدان، کە بەشدارییان لە هەڵبژاردنی ئەنجوومەنی پارێزگاکانی ساڵی ٢٠٢٣ کرد دەستپێدەکرێت.
کۆمسیۆنی باڵای سەربەخۆی هەڵبژاردنەکانی عێراق لە بەیاننامەیەكدا ئاماژەی بەوەكردووە، “بۆ سەرجەم کارمەندانی سەر سندوقی دەنگدان، کە بەشدارییان لە هەڵبژاردنی ئەنجوومەنی پارێزگاکانی ساڵی ٢٠٢٣دا کردووە، بەو پێیەی هەمیشە پاڵپشتی کۆمسیۆن و میللەت بوون، هەروەها سەرچاوەی هێز بوون بۆ سەرکەوتنی پڕۆسەی هەڵبژاردن”.
ڕاشیگەیاندووە، “ئاگادارتان دەکەینەوە کە دوای وەرگرتنی ڕەزامەندی وەزارەتی دارایی دەستمان کردووە بە دابەشکردنی پاداشتەکانتان بۆ خەرجکردنی بە شێوەی کاش”.
ئاشكراشی كردووە، پاداشتەكە لە ڕێگەی گەنجینەکانی بەغدا و پارێزگاکانەوە دابەشدەکرێت، بۆ ئەو بڕە پارانەی کە پێشتر لە مانگی ئابی ٢٠٢٤دا گواستراونەتەوە سەر حسابی وەزارەتی دارایی”.
كۆمسیۆن جەختیشی كردۆتەوە، “بەربەست لەبەردەم دابەشکردنیدا مەرجی وەزارەت بوو کە خەرجکردنەکە لەڕێگەیIBAN و کی کارد-ەوە بێت، دوای نامەنووسیش، ڕەزامەندی دەربڕی لەسەر خەرجکردنی بە پارەی کاش. ئێمە خەمی بەردەوامی خۆمان بۆ مافەکانتان پشتڕاست دەکەینەوە و سوپاسگوزاری خۆمان بۆ هەوڵە گەورەکانتان لە خزمەتکردنی پرۆسەی دیموکراسیدا دەردەبڕین”.
