پارێزگاری هەولێر ڕایگەیاند، پێویستە داواکارییەکانمان ئاڕاستەی ئەو شوێنە بکەین کە ستەممان لێدەکات کە بەغدایە و ئەمڕۆش هەولێر تاقەتی وەرگرتنی ئەو میوانە ڕەزاقورسانەی نییە.
ئەمڕۆ یەکشەممە، ئومێد خۆشناو، پارێزگاری هەولێر دەربارەی خۆپیشاندانە چاوەڕوانکراوەکەی ئەمڕۆ مامۆستایان ڕایگەیاند، ئەو کەسانەی چاوپێکەوتنیان لەگەڵ دەکرێت کابرا عەرەب دەردەچێت.
وتیشی، “هەولێر شارێکی میوان دۆستە بەڵام پێشوازی لەو میوانە ڕەزاقورسانە ناکات”.
پارێزگاری هەولێر جەختیشیکردەوە کە کەس بە فەرمی داوای مۆڵەتی خۆپیشاندان یان مانگرتنی نەکردووە و لە ڕووی یاساییەوە ڕووبەڕووی هەر خۆپیشاندان یان گردبوونەوەیەک دەبنەوە.
ئومێد خۆشناو ڕاشیگەیاند، دەبێت یەکگرتووانە پشتیوانی لە حکومەتی هەریمی کوردستان بکەین و ناڕەزاییەکانمان ئاڕاستەی ئەو شوێنە بکەین کە ستەممان لێ دەکات کە بەغدادە.
جەختیشیکردەوە لەوەی “خەڵک لە هەولێر خەریکی کەسابەت و دەوامی خۆیەتی”.
