تۆڕی “ئێن بی سی نیوز”ی ئەمریکی وردەکاری نوێی پەیوەست بە ٢٤ کاتژمێری ساتەوەختەکان ئاشکراکرد، کە بەشار ئەسەد سەرۆکی پێشووی ڕژێمی سووریا لە وڵاتەکەی بەسەری بردووە، پێش ئەوەی لە بەیانی ڕۆژی یەکشەممە ٨ی کانوونی دووەمدا بەرەو ڕووسیا هەڵبێت.
بە پێی ڕاپۆرتی تۆڕی “ئێن بی سی نیوز”ی ئەمریکی، ٧ی کانوونی یەکەم شایەتی پێشهاتە خێراکانی بەخۆیەوە بینی کە بە کەوتنی شاری حومس بە دەستی گرووپە چەکدارەکان دەستیپێکرد.
لەو ڕۆژەدا ئەسەد دیدارێکی داخراوی لەگەڵ عەلی لاریجانی ڕاوێژکاری ڕێبەری شۆڕشی ئیسلامی ئێران ئەنجامدا، کە بە پێی تۆڕەکە هیچ کام لە یاریدەدەرە ئاساییەکانی ئامادە نەبوون.
بە وتەی کامیل سەقەر، بەڕێوەبەری پێشووی نووسینگەی ڕاگەیاندنی سەرۆکایەتیی سووریا(ڕژێمی ئەسەد)، ئەم کۆبوونەوەیە “یەکلاکەرەوە بوو”، وەک چۆن لەو ماوەیەدا ڕوون بووەوە کە “هیچ کەسێک ئامادە نییە بۆ بەرگریکردن لە ڕژێمی ئەسەد شەڕ بکات، نە ئێران، نە هەسەدە، نە ڕووسیا، تەنانەت خودی سوپای سووریاش”.
هەمان سەرچاوە ئاماژە بەوە دەکات کە ڕژێمی پێشوو “لەو ڕۆژەدا تێگەیشتووە کە کۆتایی هاتووە” و لە هەوڵێکدا بۆ پەردەپۆشکردنی پلانەکانی هەڵهاتن، “ئەسەد فەرمانی داوە، بە ئامادەکردنی شوێنێک لە کۆشکی موهاجیرین، بۆ ئەوەی وتارێکی ٤٠٠ وشەیی تێدا پێشکەش بکات”.
تیمی تەکنیکی و وێنەگرتن و هەموو ئامێرە پێویستەکان دانران، بەڵام وتارەکە پێشکەش نەکرا.
کاتژمێر ٦:٥٨ خولەکی پاشنیوەڕۆ، کۆشکی سەرۆکایەتی بەیاننامەیەکی بڵاوکردەوە و جەختی لەوە کردەوە کە “ئەسەد لە دیمەشقەو سەرقاڵی کاروبارەکانی کۆشکە.
هەر لەو چوارچێوەیەشدا، مازن ئەیون، کارمەندی ئاژانسی هەواڵی سووریا(سانا) ئاشکرایکرد کە “کاتژمێر حەوتی ئێوارە پەیوەندییەکی پێگەیشتووە بۆ ئەوەی ئەم لێدوانە وەربگێڕێتە سەر زمانی ئینگلیزی، لە کاتێکدا ئەسەد بە نهێنی خۆی بۆ هەڵهاتن ئامادە دەکرد”.
کامیل سەقەر، بەڕێوەبەری پێشووی نووسینگەی ڕاگەیاندنی سەرۆکایەتیی سووریا دەڵێت؛ تا کاتژمێر ٢:٣٠ خولەکی بەیانی ڕۆژی یەکشەممە، کۆشکی سەرۆکایەتی نزیک بوو لە چۆڵبوون، ئاشکرایکرد کە تەنیا دوو کەس لەو شوێنە ماونەتەوە، ئەوانیش ئەو و کارمەندێکی دیکەی فەرمانگەی ڕاگەیاندن بوون.
ئەسەد بەبێ ئەوەی بە کەس بڵێت بۆ کوێ دەڕوات، بەرەو بنکەی ئاسمانی حمەیمیم و لەوێشەوە پێش خۆرهەڵاتن بەرەو مۆسکۆ ڕۆیشت.
تۆڕی “ئێن بی سی نیوز”ی ئەمریکی، ئاشکرایدەکات؛ کە شاری حەلەب کەوتە دەستی ئۆپۆزسیۆن، لەو ڕۆژەدا ئەسەد لە مۆسکۆ بوو، “چوو بوو بۆ داوای یارمەتی لە ڤلادیمێر پوتین، سەرۆکی ڕووسیا”.
شەوی ڕووخانی ڕژێمی ئەسەد، دەنگی تەلەفزیۆنی دەوڵەتی سووریا وەستا و بۆشایییەکی میدیایی بەجێهێشت، لە کاتێکدا پرسیارەکان سەبارەت بە نهێنی کاراکردنەوەی ئەم پلاتفۆرمە میدیاییە گرنگە تا ئیستا بێ وەڵامن.
سەقەر دەڵێت: پوتین بەڵێنی دا کە لە ڕێگەی ئاسمانییەوە یارمەتی سەربازیی پێشکەش بکات، بەڵام ئەو یارمەتییە هەرگیز نەگەیشت.
ئەسەد لە ٢٨ی هەمان مانگ گەڕایەوە دیمەشق، بەڵام ئێران کە هاوپەیمانی دیکەی بوو بە هانایەوە نەهات.
لە ٥ی کانوونی دووەمدا شاری حەما کەوتە دەستی ئۆپۆزسیۆن. بەگوێرەی سەقەر، “ئەسەد هەوڵیدا پەیوەندی بە پوتینەوە بکات، کە سەردانی بیلاڕوسی دەکرد، بەڵام سەرۆکی ڕووسیا وەڵامی پەیوەندییەکانی نەدایەوە”.
دواتر ڕووداوەکان پەرەیان سەند لەگەڵ بەردەوامبوونی پێشڕەوی ئۆپۆزسیۆن، تا کاتژمێرەکانی سەرەتای بەیانی یەکشەممە ٨ی کانوونی دووەم، کاتێک هەواڵی هەڵهاتنی ئەسەد لە ڕێگەی بڵندگۆکانی مزگەوتەکانی دیمەشقی پایتەختەوە بڵاوبووەوە.
مازن ئەیون، کارمەندی ئاژانسی هەواڵی سووریا (سانا)، باسی ئەو دیمەنە دەکات و دەڵێت “کاتژمێر سێی بەیانی بە دەنگی تەقە لە خەو هەڵسا، کاتێک سەیری دەرەوەی پەنجەرەکەی کرد، بینی سەربازەکان جلوبەرگی سەربازییان داکەندووە”.
تا نیوەڕۆ ئۆپۆزسیۆن کۆنترۆڵی تەواوی پایتەختی گرتبووە دەست و سەرۆکی ڕێکخراوی دەستەی تەحریر شام کە لە ئەمریکا و وڵاتانی دیکەدا وەک ڕێکخراوێکی تیرۆریستی پۆلێن دەکرێت، ئەحمەد ئەلشەرع کە بە “ئەبو محەممەد ئەلجولانی” ناسراوە، گەیشتە کۆشکی سەرۆکایەتی، بەم شێوەیەش کۆتایی بە سەردەمی دەیان ساڵەی حوکمڕانی هێنا.
